娱乐专题：胡定欣唔急组织家庭

入行13年的胡定欣在娱乐圈所经历的艰苦、所面对的流言蜚语，绝对超出常人13年应有的分量，但一直以平常心面对的她笑着说学懂放下，更坦言已经满足现状。正踏入收成期的她，乐见工作量不断增加，不过她却笑指实属“还债”。

至于她每当讲起音乐人男友陈明道（Terry），自然甜在心头，放下公仔箱中干练形象，两眼冒起心心，化作幸福的女人：“喺佢身边好有安全感。”

演技备受肯定的胡定欣，近年凭出色、亮眼的表现而赚取众多工作机会，对此她却非常谦厚，更笑称只是“还债”：“我觉得今年嘅工作量系还番上年嘅债，上年时间真系比较松动，起码有一半嘅时间放紧假。上年都系拍咗一套半嘅剧，《名门暗战》同埋半套《鬼同你OT》，但今年除咗《鬼同你OT》之外，仲有《公公出宫》同《城寨英雄》，再迟啲又有《一屋老友记》。”正拍摄《城寨英雄》的她大赞监制文伟鸿有Heart：“佢升咗监制之后终于等到机会同佢合作，佢仲做紧导演时，同佢拍《刑警》识，跟住佢就升监制喇！一直都等机会再同佢合作，因为同佢开工、拍剧系一件好满足嘅事，佢真系一个好有心嘅监制，佢做导演时已经好锺意同佢合作。”

被指“姣”得啖笑

身为公众人物，难免体验只有公众人物才会感受到的无奈，定欣也不能幸免。即使现时以乐观的心勇于面对，但满身箭伤的她亦曾对流言蜚语无能为力：“可能初入行时，观众唔系好认识我，有时喺报章杂志嘅报道上面，用啲唔系几好嘅字眼嚟形容我，好似话我‘姣’咁，早排又话我‘逼婚’，但其实认识我嘅人睇完都会觉得系得啖笑，因为呢个字眼同胡定欣系唔会挂鈎。初初拍剧，我嘅角色多数系反派，唔系正路‘入屋’嘅角色，惊观众睇咗呢啲报道会误会我真系一个咁嘅人！”

行得正冇有怕

后来她意识到只要做好自己，所有子虚乌有的闲言就自当烟消云散，清者自清：“我控制唔到人哋支笔点写，总之你唔会影到人哋话我做嘅嘢，因为我本身就唔系一个咁样嘅人。我有样嘢，唔可以话系宗旨，但系一种态度，就系好多嘢都要累积番嚟，点样处事、做人，时间耐咗，身边人、观众清楚你个人系点，如果唔系行差踏错嘅话，都唔会咁容易相信呢啲字眼。”

谈到定欣与男友外出时不时会被传媒碰见，她指不会刻意避忌，即使被发现也不是问题：“因为喺公司嘅事业已经好稳定，唔同初入行嗰时咁避忌。拍拖呢样嘢都好正常啫！都唔系一件唔见得光嘅事。我觉得只要系真心同嗰个人一齐嘅，私人时间就用番一个普通人嘅身份去面对，唔需要左闪右避。如果要避忌，咁呢个处理方法会令到双方比较紧张同唔开心，喺生活都会受影响，自自然然咁去处理就得。”

买楼孝敬父母

无论工作上有多辛苦，生活上有多挫折，父母总是定欣的避风港，为报答他们的爱护，她几乎事事都以父母为先：“其实爸爸妈妈都仲后生嘅，但系佢哋都一路迈向紧退休嘅年纪。而我上年做咗一件好开心嘅事，就系买咗间屋畀爸爸妈妈，佢哋都有份一齐夹钱，咁我就负责供，住咗呢大半年，我都觉得佢哋住得好开心，呢件事好似系我呢30年嚟做得最啱嘅一件事咁。”眼见两老生活满足无忧，她心中的喜悦随即油然而生：“每逢星期六、日，又或者唔使做嘢，我都一定会返屋企同爸爸妈妈食饭，咁就已经觉得好满足，而呢种满足感同事业畀到我嘅又好唔同，呢个亦都畀到动力我努力工作。”

间接听到“催婚”

问家人有否催婚？定欣坦言父母总是无声无息地担心她：“爸爸妈妈都想我呢个女搵到个Mr. Right嘅，因为爸爸妈妈结婚时都系好年轻，我哋已经比起爸爸妈妈迟咗10年有多，佢冇开口问我嘅，但系我喺其他人口中间接听到啰！话我爸爸唔知我几时至结婚。（有压力？）咁又冇，听到嗰刻就觉得好得意，因为爸爸妈妈从来都冇开口讲‘你好结婚生仔喇喎’，暗地里佢都想我快啲结婚。”

剧接剧的定欣，要抽时间拍拖亦不是一件易事：“其实佢都好忙，大家都好想喺事业上再有发展，所以都争取时间等大家相处多啲。（结婚？）呢样嘢就冇乜特别打算，虽然女孩子始终都想组织家庭，但呢样嘢从来都唔急得，Moment到嘅时候就会到，我往往都觉得计划系追唔上变化，现有嘅嘢我已经好满足。（即系会随时闪婚爬杏儿头？）一定唔会爬呢个大家姐个头嘅。（男友突然求婚点算？）就算系都系求婚啫，未结住嘅，不过唔敢谂呢啲。”

“返屋企佢会凼我！”

谈到男友，一向少提感情事的定欣自然甜笑起来，赞到男友只应天上有，畀足100分：“佢心地好好，充满正能量，个人好成熟，喺佢身边好有安全感。而我喺工作上做咩佢都好支持我、鼓励我，令我工作更加有力量。当我做嘢做得辛苦时，返到屋企佢都会凼我。我同佢嘅生活真系好普通，都系食饭、行街，冇咩特别，不过因为佢系一个音乐人，佢有好多音乐上嘅嘢会同我分享，我又好锺意唱歌，佢分享畀我嘅音乐知识都令我好有得着。”问她是否有搞“胡说八道Band”的念头？她兴奋地说：“有谂过㗎！胡蓓蔚同胡杏儿都好锺意唱歌，所以都想搞个音乐会，唔使好大型，够我哋几个锺意唱歌就得，但事实上我哋几个都好忙，未必就到时间，但净系谂吓已经觉得好期待。”

旅行拍拖叉足电

定欣本打算趁拍完《公公出宫》后有空档到外地松弛一下，但由于要为《鬼同你OT》宣传，加上要为《城寨英雄》练功，所以只能去一个短途旅行：“休息系为咗充吓电，有个好啲嘅状态做之后嘅嘢。有假期就当然想去有阳光与海滩嘅地方啦！可以游吓水，尤其系夏天，但最后都系去咗新加坡，同好朋友去嘅。（即系男朋友？）系啦！去咗5、6日。（成个旅程好照顾你？）佢不嬲都好照顾我嘅。”

约姊妹游世界

除了男友外，其实定欣好想与“胡说八道会”一班姊妹们周游列国，她说：“但系佢哋都好忙，依家连最唔拍剧嘅胡蓓蔚都拍剧，不过佢拍剧我都不知几开心，佢终于可以经历、感受我哋拍剧嘅时间，因为佢净系做主持嘅工作，冇我哋拍剧嘅时间咁长，佢以前都唔系好明点解我哋啲通告咁癫、佢老公啲通告咁癫，收28开06、07嗰啲。我终于听到佢讲：‘我好攰呀，我唔去食饭喇，你哋去啦！’我就话好嘢，你终于明喇！终于到你挨喇！连佢老公豹哥（单立文）都系咁讲。”

一个人搵乐趣

谈起一个人旅行，外表硬净的定欣坦言既爱且恨：“始终有朋友去系会开心啲，不过都有试过冇朋友去旅行，之前去西班牙、纽约都系自己去，所以佢哋成日闹我点解自己一个人去，我就即刻讲：‘就系因为你哋唔得闲啰！’”虽然自己一个人四处游走未必有友伴的欢笑声作导航，却充满另一种乐趣：“你会睇多好多嘢，因为好多嘢都需要自己去安排，系有时会寂寞啲，特别系食饭嘅时候，因为唔会嗌得多嘢食、会食得少啲，但周围睇嘢一个人都好OK。一班人去旅行就会好依赖，又会有时太挂住倾偈，睇少咗好多沿途嘅风景。”不过自由自在总有些少代价：“搭错车唔会畀人闹，不过就会嬲自己。”

打泰拳为双赢

除了喜欢用歌声表达自己外，本身热爱跑步的定欣最近爱上泰拳，以动态的一面展现属于她的美态：“其实一半系为咗拍剧，一半就系为咗想个身体健康啲。做运动真系对工作更加有利，因为愈做个人就愈多Energy，做完之后个感觉又好好，谂嘢都正面啲、开心啲，系一个好好嘅循环影响，同时又可以以身作则，影响身边嘅人Care多啲自己个身体。（会唔会怕太大只？）女仔又好难会变得好大只嘅，少少肌肉都OK嘅，点都有练到个女性线条出嚟，男友都有赞我Fit咗，不过我身形不嬲都唔差！”