郭采潔翻唱《旋木》　網友大讚好聽

台灣女星郭采潔一向畀人嬌滴滴又甜美嘅感覺，唱起歌上嚟仲有一種小清新感覺，早前佢同內地藝人鄭愷合作拍愛情片《前任2：備胎反擊戰》，而旋轉木馬就係戲中重要嘅場景，亦係郭采潔同鄭愷喺戲入面嘅愛情見證，為咗配合戲中情景，郭采潔仲向天后王菲挑機，翻唱佢嘅歌曲《旋木》！喺《前》片嘅MV預告片入面，鄭愷同郭采潔有一段「相愛但不能愛」嘅情路，而一向畀人樂觀爽朗嘅形象嘅郭采潔，經常用憂鬱嘅眼神望住鄭愷，真係我見猶憐，網民見到都大叫心痛。

唱出不同年代嘅意境

而《旋木》呢首歌就係講一個人發現自己唔能夠同戀人走到最後，而覺得悲傷同絕望，所以完全表達到佢哋可歌可泣嘅愛情，網民聽完都大讚郭采潔將首歌詮釋得恰到好處，有網民力撐天后唱功細膩，亦有人估計係因為王菲歷盡情路上嘅高低起跌，令首歌更富味道，而郭采潔就用咗比較清新嘅方法重新演繹首歌，網民就話雖然郭采潔同王菲唱出嚟嘅風格好唔同，不過就唱出咗唔同年代嘅意境：「兩個都唱得好好聽啊！王菲就好似講緊一段轟烈嘅愛情，郭采潔就唱出初戀純純嘅感覺，真係好正。」除咗郭采潔之外，仲有唔少重量級歌手都翻唱過呢首經典之作，好似台灣組合S.H.E成員田馥甄（Hebe）同台灣小天王蕭敬騰，個個都唱出獨特嘅風格，好唔好聽就由網民定斷啦！

有網民仲揣測郭采潔今次唱得咁入心入肺，會唔會係因為早前同楊祐寧分手，受過情傷嘅佢將自己完完全全咁代入首歌，所以成功咁將首歌發揮得淋漓盡致喎！

網民有話兒：

Krxxx_k：兩個都唱得好好聽啊！王菲就好似講緊一段轟烈嘅愛情，郭采潔就唱出初戀純純嘅感覺，真係好正

hixx：佢唱嗰陣可能諗起楊祐寧，所以特別入心入肺

lamxxx：估唔到郭采潔都可以拍得住王菲

faixxx_hax：首歌同個MV真係perfect match!!!

我是XX：睇到郭采潔個喊樣諗起佢同楊祐寧，真係好陰公！