王菀之宣布婚訊 網民戥張敬軒心碎
20151111
東網電視
更多新聞短片
「愛人」要結婚了，新郎不是我……
「進擊之Ivana」結婚喇！歌手王菀之（Ivana）早前被爆去年中主動出擊溝掂「Figure王」Eric So（蘇卓航），二人撻着不久後，「進擊之Ivana」更成功攻佔男友愛巢共賦同居。關係公開後，一對小情人愈愛愈高調，提起結婚，Ivana就冧爆甜笑，仲揚言：「喺我心目中冇人出色過佢！」不過網民就話：「吓…咁張敬軒點算呀？」
軒仔菀之被公認一對
36歲嘅Ivana今日喺網上發表愛的宣言，宣布自己嫁得出，脫離剩女行列。不過，喺大家祝福佢嘅同時，有網民就話：「吓，我仲以為佢男朋友係張敬軒喎！唔通娛樂圈又要多對「洪永城和黃翠如」？
軒仔大方送祝福
話說Ivana同軒仔曾經因為太老友，又成日出雙入對，就正正好似洪永城同黃翠如呢一對咁，又好難怪大家覺得佢哋先係一對嘅！之不過，其實軒仔已經大方公開祝福最愛嘅Ivana搵到佢嘅最愛，仲話自己要做「胖娘」添！人哋嘅純友誼純過蒸餾水呀，大家就唔好再FF諗咁多喇！
菀之未婚夫情史多籮籮
而相比起Ivana，佢嘅未婚夫Eric So雖然唔算係圈中人，不過啲緋聞分分鐘多過啲圈中人喎，有女星殺手之稱嘅Eric，先後同過盧巧音、蒙嘉慧同杜如風拍拖，情史比Ivana更精彩，網民都提醒Ivana要睇實啲呀！網民仲好有興致咁總結娛圈內邊幾對大家覺得好襯，但係最後要分開，或者根本開始唔到嘅組合，分別有「鐵膽」洪永城、黃翠如；胡杏兒、黃宗澤；鄭嘉穎、周麗淇；仲有陳奕迅、楊千嬅！
網民有話兒：
張景XX莉：一定要做姊妹啦軒仔！
伊XX度：張敬軒做伴娘！
ikeaXX：Eric So先後同過盧巧音、蒙嘉慧、杜如風拍拖，易彎那（Ivana）要小心睇實喎！
吳X望：你與他會攜手衷心慶祝我，如若你是好朋友，就吻我……
營多XX飯：乜佢男朋友唔係張敬軒咩？
「東網巨星」fb專頁：
以抵死角度，分析各大娛樂新聞，加埋識睇一定要睇嘅網民妙論，包保享盡「Fun」秒，快啲入嚟畀Like啦。