好老婆冇樣睇！昆凌VS徐濠縈
20151115
東網電視
更多新聞短片
昆凌（左）同徐濠縈都絕對稱得上係好老婆。
好多時，大家睇嘢都淨係會睇表面，講起昆凌，好多都會覺得佢先23歲，年紀細、未定性，點做人老婆同媽咪；而徐濠縈就成日畀人話淨係識使老公錢，咁事實又係咪咁呢？有網民就喺網上為佢哋嚟個大平反！
昆凌年紀細EQ高
昆凌由前黑澀會美眉轉眼變成天王嫂，下嫁周杰倫（Jay）再極速誕下愛女Hathaway榮升人母，引起唔少Jay迷嘅質疑同妒忌！日前昆凌產後首度上綜藝節目做嘉賓，現身《天天向上》。節目一出，大批網民對昆凌嘅感覺有180度改觀，話佢喺節目上一直微笑，就算主持人嘅笑話唔好笑又或者聽唔明冷笑話都好，佢都一直面帶微笑，勁sweet。網民就記得周杰倫講過「沒人會不喜歡她」，又好似真係喎！
為咗唔想做一個無所事事嘅周太，昆凌大住個肚都畀心機工作，佢仲揭秘二人婚後嘅甜蜜生活，仲踢爆周杰倫先係「小公主」，又讚老公「最簡單的事情反而是最浪漫」。1993年出生嘅昆凌，用行動證明自己可以係一個好老婆兼好媽媽，畀當初唔睇好佢嘅人都望到佢嘅努力同成長！
徐濠縈講多無謂 行動最實際
除咗台灣天王嫂昆凌，有網民話其實香港天王嫂徐濠縈都有自己「收服」老公陳奕迅嘅一套！無論外界點樣抨擊佢「敗家」鍾意亂花錢，阿徐仍然理直氣壯講過：「Eason好寵我，我唔覺得使老公錢有咩問題。」講中老婆們嘅心聲！
阿徐同Eason 1996年就開始拍拖，不知不覺已經就嚟20年，喺2002年Eason台北開騷跌落台受傷，阿徐嚇到狂喊，不顧一切搭貨機飛去台灣，全心照顧Eason，仲喺Eason財政有困難時將私己錢都貢獻。喺大家都以「A餐」嚟形容阿徐嘅時候，其實根本就未了解佢為Eason付出嘅一切。
網民有話兒
AmyXXXX：之前一直支持「雙J戀」，依家睇到昆凌情商高又有智慧，靚女識講嘢又溫柔，我開始明白周杰倫揀佢嘅原因，真係冇人會唔鍾意佢。
姑娘XX：昆凌一定係上一輩拯救咗宇宙，一臉幸福話老公負責換片！佢愈來愈美，太美太優雅，同佢一齊生活應該身邊嘅人都會變到好溫柔！
洋娃娃XXX：之前對昆凌唔了解，依家好感度倍增！年輕漂亮乖巧、身材好、家教好、性格好、聲音好聽，咁樣嘅女仔有邊個會唔鍾意？93年出世有老公有女兒仲一直努力奮鬥，絕對係人生贏家！
張小明XX：徐濠縈對Eason真係真愛，話佢淨係識使錢買嘢嘅人根本唔了解佢係一個點嘅女人。
「東網巨星」fb專頁：
每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。