古天樂翻拍《今期流行》MV？

型男古天樂（古仔）唔止做戲好，但其實佢以前都出過歌，其中佢首《今期流行》更加係經典中嘅經典！網民經常翻Loop《今》，皆因MV中嘅古仔舞步比較「獨特」，網民仲叫呢隻舞為「拜神舞」，有網友仲叫古仔都係專心做戲好啲！

而近日《今》再被炒起，原來事緣古仔早前為荷里活大片《星球大戰：原力覺醒》拍攝宣傳片，有網民將宣傳片同《今》Crossover，二次創作出新MV，效果更異常地夾，即被網民紛紛轉載到各大討論區！

宣傳片中古仔化身「絕地武士」，一邊揮動光劍，一邊以兇狠眼神Chok爆望實鏡頭。原片就配上一段刺激緊張嘅音樂，營造出驚險效果，網民都大讚拍得幾型。不過有豐富想像力嘅網民，竟然將呢段片聯想起古仔當年《今》MV，仲出動惡搞段片，配上《今》嘅「今期流行～就像感冒橫行～」，頓時成個Mood出晒嚟！唔怪得嘅，皆因宣傳片同當年嘅MV都有異曲同工之妙，有幾秒嘅動作差唔多，唔同嘅只係依家手持住把光劍，先引起網民聯想！

網民睇完呢段片，有人就信以為《今》真係再翻拍MV，仲話：「古仔今次演出夠忘我！」、「重演經典！」不過當知道呢段只係二次創作，網民都讚古仔喺呢段宣傳片中落足心機，簡直係型到爆！

網民有話兒：

Kaxxx：識得一定睇呢條！

Waxx Si：好型呀！

xxxi Law：當年古仔幾咁後生！

Shax xxu：我同朋友唱K都成日做佢呢個動作