網民熱話:警訊紅人逐個捉

20151121
東網電視
更多新聞短片
吳良榮(左起)、Heiley與王文韜憑住喺《警訊》中嘅演出受到網民熱捧。

有警訊之花之稱嘅「東網Baby」馬溱禧(Heiley)近日就憑甜美笑容同逼爆上圍而彈出,成功吸引唔少粉絲個個星期六亦喺電視機前捧場,惟日前Heiley就於其facebook中自爆畀人喺email問價,並貼上截圖直斥其非,令唔少網民見狀亦紛紛留言大叫心痛,仲戥佢唔抵話:「咁都得?真係人怕出名,豬怕肥!」

《警訊》其實除咗帶挈咗「性感騙徒」Heiley上位之外,仲有資歷十足嘅大師兄吳良榮,做咗近廿年嘅佢一樣儲落一大班fans。被指「賊眉賊眼」嘅佢喺《警訊》模擬片段入面,可謂咩壞人都做過,強姦、偷、呃、拐、騙樣樣齊,仲次次都做到一樣咁傳神,有網民更因此封佢為「鄭子誠接班人」,仲有人指如果《警訊》係計埋落台慶頒獎禮,佢一定可以入圍視帝:「無綫爭咗佢個視帝位十幾廿年,幾時補番畀佢?如果佢同視帝祥做對手戲應該會幾精彩!」

介紹咗咁多騙徒,最後又點可以計漏專做受害者,又毒到入心嘅「心形鎖男」王文韜呢?佢呢句:「個密碼…係…個心啊~」嘅經典對白仲洗腦到齋睇都感覺到好似聽到聲咁,當時更有大批網民於討論區驚嘆:「隔住個mon都feel到佢有幾毒…」令佢一片成名,認真唔講得笑!今年24歲,做咗兩年實驗室技術員嘅佢憑一片成名後,更吸引咗電器公司搵佢拍廣告,將案件再重溫一次,可算抽水抽到盡。

網民有話兒:
kexxxxxxn:咁都得?真係人怕出名,豬怕肥!
candxxxll:隔住個mon都feel到佢有幾毒...
ponnelxxx:由一開始睇到好驚,慢慢就變得好有親切感~
xxxx0202:鄭子誠接班人wor喂!
ltexxx:無綫差(爭)咗佢個視帝位十幾廿年,幾時補返(番)畀佢?如果佢同視帝祥做對手戲應該會幾精彩!