娛樂專題：陳國邦為破升遷夢決心離巢

20151123
  • 東網電視
    更多新聞短片
    陳國邦不欲再被「升遷」夢綑綁，決意離巢追夢。
    一開電視就見到陳國邦！陳國邦到底有幾多個分身？投身演藝界近30年的他視人生如戲，現實中擔當「丈夫」、「爸爸」及「演員」等角色，讀書時更曾分身打四份工，種種經歷令他容易代入不同角色，發揮演技！惟近日他發表一封「給無綫電視的公開信」下定決心離巢，原來只為擺脫無休止的「升遷」願望，可更享受演藝工作：「呢種想升職嘅心態一直傷害緊我！」此舉獲太太羅敏莊無限量支持，他回想太太當時的反應，即甜笑道：「幾難得！」
    打開「悶蛋」心扉
    從事演藝工作近30載、效力無綫19年的資深藝人陳國邦，早前在社交網發表一封「給無綫電視的公開信」，正式向外界宣布「唔撈」！原來他執筆時卻未知會太太羅敏莊：「我喺加拿大做緊舞台劇時寫呢封信，太太完全唔知，發封信出去前先通知佢，佢睇到第一個反應係：『吓！你寫封咁嘅信，返唔到轉頭㗎喎！』」當時陳國邦亦不排除太太會反對：「如果佢唔係我老婆，我問都唔問，一早發出去啦！」而最後羅敏莊不假思索地回覆：「我唔介意你搵幾多錢返嚟，只想你開心。」回想太太當時的反應，陳國邦會心微笑說：「幾難得！」
    照顧太太直到最後一口氣
    自認不擅交際、思想似哲學家、愛砌模型、研究科學……陳國邦在港女眼中可能是個「悶蛋」，惟羅敏莊與他無所不談，他笑言有人會問羅敏莊：「陳國邦啞㗎喎！點解你會同到佢一齊？」或許是唯一一個能夠打開他心扉的人，每當有人如此問道，羅敏莊便會「霸氣」反駁：「佢對住你哋啞啫，對住我唔係！」
    互為心靈伴侶，陳國邦其中一大心願竟是「太太早死過我」：「喺我嘅結婚宣言中提過『我陳國邦希望照顧羅敏莊直到最後一口氣』，白啲講即係『佢死先過我』，假如我死先，佢之後嘅日子會無依無靠，我好想人生中能夠處理到伴侶嘅死亡，如果佢活到100歲，我仲健在活到110幾歲，係一件幾好嘅事！」
    每件事都拎出嚟傾
    結婚六年，兩夫婦難免有意見不合，陳國邦應對這些生活小摩擦則游刃有餘：「我哋有個準則，一件事能行動要兩個Say Yes先做到。我哋接受家庭係一個整體，唔會埋怨邊個話事權多啲，所以每件事都會拎出嚟傾，一齊決定！」故今晚食乜餸或假日到何處等大小二事都採用這個原則。
    為愛女變「白癡」
    三年前，陳國邦在劇集《大太監》飾演彭三順一角大獲好評，當時太太又為他誕下精靈女兒陳禛，每當提起寶貝女，他都會放下原本嚴肅的表情，甜笑由心而發：「對住個女我好天真，會放大白癡一面，同佢做低能事，可以一齊玩個水樽成個鐘。」年過半百的陳國邦演過海量角色，他不想女兒經歷種種人性掙扎，希望她愉快成長，又希望她將來能成為科學家：「好似愛因斯坦咁，匿喺房研究都可以成功，唔想佢經歷咁多人性上嘅層面，從事科學可以將人際因素減到最低，可能只要佢鑽研到一個定理，已經可以得到好大嘅成就，甚至改變世界！」
    演戲30年　嘗盡人生百態
    矢言要將演藝作為終身事業的陳國邦，笑言年輕時夢想成為工程師：「畢業前一心想入理工學院讀機械，由細到大都鍾意砌模型，所有零用錢都會買模型。」直到有一次在課堂上看到演藝學院安排的話劇表演，才激發他對戲劇的興趣：「戲劇要讀四年，我好奇呢門係咩學問，要讀咁耐。」
    其後陳國邦過五關斬六將，在最後一次面試時更突然開竅，爆出一段精彩抱負，促成日後的戲劇人生：「當時我天賦突然間嚟，對住面試官即係鍾景輝老師話：『人得一生，無論高低起跌，都係得一生，但如果我做咗演員，可以嘗試唔同人生，係幾咁好玩！』」當時陳國邦只有17歲，在毫無準備下說出這番改變人生的話，受用終身：「依家做咗30年戲，你問我點解咁想做戲，我都係會答當時嘅答案。我試過由學警做到總警司，我喺現實生活做到咩？」
    四份兼職圓夢
    為成全演戲夢，父母又不用承擔額外開支，陳國邦曾兼職四份工：「自己供自己讀，平時喺麵包舖瞓，朝早喺麵包舖幫手，晏晝喺學校Canteen洗碗，夜晚就喺藝術中心做帶位，每個禮拜又有三日喺超級市場落貨，但當時又唔覺得好辛苦，一來後生，二來可以一手一腳供自己，有份滿足感！」他笑言這段經歷鞏固其演技基礎：「呢啲經歷同演戲息息相關，唔同工作環境做唔同角色，認識不同階層，做戲同人生係掛鈎，要代入唔同角色。」
    苦等15年　離巢再算
    演戲為陳國邦帶來滿足感，不但在角色中得到無窮啟發，亦讓他嘗到各種人生滋味。無綫給予演戲機會，他一直珍而重之，但從一個在職人士的角度看，他一直沒有「升遷」的機會，故決心離巢。陳國邦在公司算是資深，卻一直苦等「升遷」：「你諗吓一個在職人士，我喺無綫工作四年，之後出去拍戲，提名金馬獎，之後返無綫，好似以更靚嘅『履歷表』回歸，但都係做番以往嘅崗位，仲工作咗15年。」在這「升遷」盼望無休止的15年間，陳國邦曾探究箇中原因：「試過問一啲好熟嘅監製有冇聽過我做錯事，但真係問唔到，冇人話陳國邦衰，身邊好多人都會讚陳國邦，咁我會諗可能係未有運，但15年都未有運？」
    舞台劇有得諗
    「劈炮唔撈」並非發脾氣，亦非「跳草裙舞」為爭取更好待遇，只是不想再被「升遷欲」折磨：「呢種想升職嘅心態一直傷害緊我，我想享受做戲，具體啲嚟講，以前無綫搵我客串兩日，我會覺得兩日咋？如果依家搵我客串兩日，我會抱一個玩吓嘅心態，Take It Easy！」至於日後的打算？他豁達笑說：「冇計劃，唔知道。」但可以肯定的是，陳國邦絕不會放棄演戲夢：「除非唔能夠養妻活兒，否則我都會繼續做演員，諗唔定嘅會做舞台劇，有機會嘅話咪返內地囉！」
    後記：天南地北都Talk得！
    陳國邦無話不說，對每件事都有獨特的見解，在訪問中談到科學、死亡、時事、家庭……他都樂意與筆者一一深入探討。不過，他並非「吹水」，每件事都有根有據，可見他學識淵博！
    最強娛樂APP《東網巨星》，推出全新遊戲節目《巨星放題》，除咗有謝安琪同陳奕迅擔任星級主持，仲有好多星級參賽者，最新一集有近期爆Hit嘅蝦頭，想睇佢點樣亂答啲問題同埋點樣取巧？快啲去《東網巨星》App收睇啦！
    《東網巨星》App下載連結
    Android App - http://goo.gl/GqQlC2
    iOS App - http://goo.gl/ItozKI