網民熱話：送禮勤變收禮勤即變面
20151126
東網電視
更多新聞短片
真係陰公豬，有乜慘得過收到份自己唔（太）鍾意嘅禮物，但要扮開心呀？
無綫節目《Do姐去Shopping》自從由組合農夫陸永、C君兩位「金句王」打響頭炮之後，大批觀眾幾乎晚晚都追睇，除咗為跟「DidDid」姐「瞬間看地球」外，仲可以一睹嘟姐嘅霸氣，娛樂性爆棚！相信有追開嘅朋友都知道，相識滿天下嘅嘟姐每集都會喺唔同地方買手信送畀圈中一眾好友、後輩們，雖然個個要求多多，不過對於向來品味十足嘅嘟姐嚟講，揀手信簡直喺Easy Job啦，但唯獨今次就令收禮嘅李克勤唔多滿意，仲句句有骨寸到應?！
《Do姐》咁大整蠱呀？
足球迷李克勤向來都喺「紅魔鬼」曼聯嘅死忠粉絲，相信最經典嘅一定係「送禮勤」事件，而9年前同老婆盧淑儀影結婚相，都特登去曼聯嘅主場奧脫福取景，兩人仲於上月重遊舊地，睇曼聯對曼城打吡！但如今卻獲《Do姐》劇組送車路士、利物浦嘅人形紙牌及足球套裝，認真諷刺！
克勤即寸爆
克勤第一眼見到車路士前鋒廸亞高哥斯達一比一人形紙牌嘅時候梗係「嚇到個心都離一離」，仲即直言：「即係你覺得今年嘅車路士係可以同曼聯鬥嘅？所以就擺係我前面，要我篤眼篤鼻係咪？」唔少網民睇到呢到經已戥克勤心酸，仲留言話：「人喿結婚都去奧脫福，你咁樣即係要人放廁所啫？」
再送利物浦禮物
但正所謂「送佛送到西」，克勤雖然面色有變，但梗係要送埋手上嘅禮物啦！「畀錢仔」慌死克勤唔夠嬲，拿拿臨補多刀，話紙牌唔夠實用，再攞出一袋嘢，唔知克勤有冇一秒鐘以為有曼聯禮物呢？但真係好抱歉，係冇嘅！袋入面係兩套利物浦兒童足球訓練套裝，成功令克勤呆晒，「定格」足足五秒！其後佢更一度收唔切怒火，寸爆話：「因為我係超級曼聯fans大家都知啦，但我啲仔呢就好博愛嘅，又鍾意車路士又鍾意利物浦，咁曼聯當然都ok！」收禮片段隨即更惹來唔少曼迷「聲討」，仲有人建議節目從今集開始要改名為《Did姐去kidding》！
網民有話兒：
ppxxxl：人地（哋）結婚都去奧脫福，你咁樣即係要人放廁所啫？
壽x:可不可能還我曼聯？
圭xx中：克勤o咗好多次嘴！dodo（嘟嘟）姐今次真係老貓燒鬚！
xx芋頭漲：唔係dodo（嘟嘟）揀架！梁烈唯亂咁嚟～～
gianxxxx：佢心諗Are you kidding me？死啦死啦，今次唔改名都唔得！《Did姐去kidding》
「東網巨星」fb專頁：
每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。