張家輝為張學友炮製死神角色

由影星張家輝執導兼主演的新片《陀地驅魔人》上映五天票房已過六百萬，成績相當不錯，就連在戲中客串的張學友，亦為「弟弟」家輝感到高興。今次學友客串演出死神一角，令影迷們議論紛紛，對於學友的角色被指是續集伏線，身為導演的家輝則大賣關子。

家輝相當重視「阿哥」學友在片中的死神造型，特地找來星級美指設計，化身時尚死神。學友在街上手執黑傘拍攝時，顯得特別搶眼，吸引路人行注目禮，連好友曾志愇亦前來探班，一探究竟。而同樣有份演出的林嘉欣，亦相當欣賞學友如何演活一個時尚死神。

家輝坦言籌備電影之初，已一早預留角色給學友，他說：「一開始已想搵阿哥去做，但佢係我阿哥喎，要做個有份量嘅角色！直到故事尾段衍生咗呢個角色出嚟，最後決定都係由阿哥嚟做，個威力會大啲！（同學友合作有否特別？）佢到咗依家階段，又拍唔少戲，佢自身經驗放鏡頭前已經好有力量，嗰種力量喺經驗淺嘅人冇，感染力好大，所以我冇刻意要佢做乜強烈表達，反而要佢低調啲，啱啱好就夠。」

而學友則表示：「我本應淨係出現一個鏡頭，係一個路過行人，望到一啲嘢就行咗去，但基於呢部係驚慄片，導演又唔想咁簡單，所以將我整到白晒咁，要由大家判斷我係一個咩角色，感受吓。」問到學友可滿意家輝悉心安排的角色？他笑說：「我哋演員嚟，特唔特別我哋都盡力去做，希望導演滿意啦。我覺得可以演好啲，但導演收貨就算啦。（家輝做導演是否稱職？）好好，佢非常認真，拍攝環境喺天台，要一路行6層樓到天台，之後監製話幫佢喺樓下睇螢幕，佢唔肯，又要自己行番落去睇位再拍。」問學友會否亦希望一嘗導演滋味？他坦言：「我問過家輝，佢叫我千祈唔好做，好辛苦。其實我都冇打算做，每人都有專長，呢樣唔係我想掂嘅嘢，我份人都幾硬頸，擔保唔會做。」