銅鑼灣宣傳新MV　林峯被圍場面勁墟冚

歌手林峯到銅鑼灣舉行《Heart Attack》快閃MV首播活動，吸引大批歌迷到場支持，MV播放期間，現場更有小歌迷表現得手舞足蹈，十分可愛。MV播完後，主角林峯現身，旋即被歌迷和途人圍堵，引起小混亂，場面墟冚。

問到可有被墟冚場面嚇親？林峯表示反而很開心：「好耐未試過出活動前會緊張，今次成個形式貼緊大眾，其實今次本身係想好似之前咁正式開press con，但今次個MV、成件事都係自己同工作人員落手落腳有份策劃，策劃咗就嚟一年，始終兩年幾冇出新歌，所以想特別少少，而且可以等多啲人知道呢件事，所以今日就喺條街度，同大家一齊睇MV首播。（但有啲亂？）呢度係有啲尷尬，但我相信大家都好守秩序，依家都唔太混亂。」

唔一定同千語慶生

講到他將於本月8日生日，他表示當日應該要工作，問到當日可會在香港？他謂：「未知，12月要做好多商演。（都要慶祝架）唔一定正日。（女友吳千語同你一齊慶祝？去旅行？）睇吓有冇時間，不過佢依家喺泰國拍戲。（咁咪冇得一齊慶祝？）唔緊要。（你會唔會飛去搵佢慶祝生日？）咁又唔使嘅，我都有工作在身，同埋都想專注番音樂。（佢飛過嚟香港？）等佢做完嘢先。」

為質素放棄攞獎

講到現時才派歌豈不是趕不及頒獎禮奪獎？他表示：「每個頒獎禮有佢哋嘅計分方式，趕唔切都冇所謂，因為本身如果想趕得切就要早兩個月派歌，但做唔切，我想質量好啲，所以唔趕。（四個頒獎禮都唔去？）應該趕唔切。」他亦講到共做了4首新歌，現時每首歌都拍了MV，希望每首歌可以plug一段較長時間，預計三至四個月後出碟。

另談到有指《使徒行者》開拍電影版，但就沒有林峯份，改由佘詩曼、古天樂、張家輝擔大旗，問到他覺得此組合如何？他表示：「呢個組合都ok，但最緊要嘅靈魂人物係監製，有佢喺度我都好有信心。（都有指TVB想搵番原班以網劇形式拍《使徒行者2》？）再傾，睇吓個期。」

訪問完後，有歌迷向林峯送上蛋糕及生日禮物，氹得他十分開心。

「東網巨星」fb專頁：

以抵死角度，分析各大娛樂新聞，加埋識睇一定要睇嘅網民妙論，包保享盡「Fun」秒，快啲入嚟畀Like啦。