太陽報C1：郭富城方媛驚爆父女戀

最近突然戴上戒指，放風想盡快結婚生仔、現年50歲的郭富城，與年輕23歲的上海嫩模方媛（Moka）共譜「父女戀」！向來低調處理感情事的城城今次一反常態，前晚在微博罕有地高調認愛，確認Moka的城嫂地位！昨晚，他冧爆表示希望得到祝福，並不排除閃婚，但煞有介事地說：「生活唔係戰場，唔需要一較高下！」似反擊舊愛熊黛林出招晒「情侶鞋」！

現年50歲的郭富城與拍拖七年的模特兒熊黛林於2013年分手後，筍盤城城桃花運依然旺盛，去年有指他潮玩Instagram，主動關注18名圈中女星，如蔚雨芯及許雅婷（Kabby）等，其中一員是來自上海、現年27歲的內地嫩模方媛（Moka），其實城城早前已與她傳緋聞，但對方堅稱與城城只是朋友。

向來低調處理感情事的城城，早前突然放風，明言希望盡快結婚生仔，有傳當時他已與Moka秘密拍拖一年！兩人無懼相差23載的年齡及地域障礙，共譜「父女戀」！近日，Moka「人肉速遞」來港探城城，更成功攻入「城」門，城城亦出動戰車，甘願做「柴可夫司機」管接管送，認真「對你愛不完」！

驚青刪留言

渴望成家立室的城城，前晚10時44分罕有地在微博高調認愛，上載一張在車廂中手拖手的照片，並留言：「這樣開車要慢一點。」其後標籤一個名為「MK_fy」的帳戶，正是Moka本人，正式獲城城公開城嫂地位！收到「愛的呼喚」的方媛個多小時後「夫唱婦隨」，轉發訊息並冧爆留言：「嗯！慢慢開！」更貼上笑臉符號，戀情震驚中港台三地！榮升「新城嫂」的Moka獲多位好友送祝福，她亦在微信朋友圈留言：「謝謝大家的祝福！」但未知是否眼見已成為網友焦點，她昨晨火速刪走甜蜜留言，除了刪除微信朋友圈外，更將部分朋友從微信中刪走，當中包括多位男性朋友，連帶更改微博及微信的帳戶名稱，似乎想回歸低調，然而天王首次認愛已引起哄動，Moka火速被起底！

而城城昨晚認愛後首度亮相，得到愛情滋潤的他零舍風騷！他明言選擇公開戀情，全因人在不同階段都需要作檢討：「生活方面大家都知最近發生咩事，大家睇住我成長，以前感情低調，同另一個對象用新方式，希望得到大家認同、祝福。（咁想公開戀情？）唔同階段都想成長改變，現階段公開唔影響工作。（認定佢？）唔係想睇番以前，每個人都有過去，想改變生活方式。」他又透露與Moka拍拖只是一段短時間：「佢係朋友嘅朋友，食飯識。（張智霖介紹？）唔係，大家咪誤會，唔需要執着幾時、邊度食飯識，希望得到大家祝福。（會結婚？）將來冇人知，公開依家對我嚟講好適合。（佢有咩吸引你？）將來話你知啦！（女友勁嗲？）私人嘢就唔講喇！」

寸Lynn「唔需要一較高下」

談到有報道指女友在機場成為追訪對象被嚇倒，他說：「記者一向熱情，但撲出嚟好似打劫咁，你話怕唔怕？我呢方面經驗比較豐富，男人有責任保護身邊朋友！（克服年齡差距？）相處唔關事，發掘共同思想話題，年齡唔係問題，加上我都唔似啦！衰鬼。」至於會否閃婚？他說：「交畀個天啦！」早前提過想成家？他說：「用呢種方式認識對方，慢慢發展，公開係想坦白同誠實。（有冇了解女友嘅過去？）每個人都有過去，唔能夠數算人，大家真誠去發展。」而提到王思聰在微博稱「愛過」Moka，城城說：「每個人都要學識尊重對方，都有過去。（熊黛林都祝福你！）希望所有人都幸福。」記者再追問有關熊黛林（Lynn）的問題，城城猶疑很久，當在場記者準備離開時，城城卻突然發表感想：「有句嘢一定要同大家講，『生活唔係戰場，唔需要一較高下！』」言語間似反擊大晒情侶鞋的舊愛！

更多新聞請瀏覽太陽報網頁：

http://the-sun.on.cc/