鄭融開騷唱英文歌　呻外籍男友唔捧場

歌手鄭融（Stephanie）、劉威煌等出席新城活動，Stephanie獲送一把七彩雨傘，寓意她為公司一姐，劉威煌則獲贈消毒濕紙巾，因為他早前的音樂會上被老闆林盛斌強吻。

想搞小交響樂團騷

受訪時，Stephanie表示一提到「阿姐」自己只會想到汪明荃：「冇阿唔阿姐嘅，我嘅心態係想挑戰同進步，就係咁，阿姐係要有閱歷，我仲好遙遠。」她又謂正與公司商討開音樂會，自己亦有很多想法：「因為我慢歌多啲，我想搞個小交響樂團嘅騷，地點未知。」

想聖誕睇阿詩開騷

Stephanie表示知道何韻詩將在聖誕節起一連三日舉行以Campfire為主題的演出，又認為在聖誕演出很有氣氛，所以屆時希望到場觀看。問到聖誕節不用陪外籍男友？她說：「我25要上內地，26頒獎禮，得番27，我都唔想自己係一個唔好嘅女朋友，但我又想去睇阿詩。（一齊去？）佢唔識中文。（你翻譯？）我會開Google囉！前兩日我有騷，唱《Last Christmas 》，難得我唱英文歌，叫佢嚟，但佢都唔嚟！」