網民激推汪明荃橫掃頒獎禮！

踏入年尾，又係娛樂圈頒發成績表嘅時間，嚟緊就有《萬千星輝頒獎禮》同《勁歌金曲頒獎禮》，到底邊個會係大贏家？原來網民心目中有個答案，就係今年68歲嘅殿堂級藝人汪明荃！呢兩大頒獎禮加入全民投票元素，畀大家選出心水人物，故一眾支持汪明荃嘅網民就發起運動，呼籲大家投佢神聖一票，希望以網路力量推舉汪明荃為頒獎禮大贏家！

汪明荃今年嘅成績當然有目共睹，最令人深刻莫過於佢喺劇集《華麗轉身》嘅演出，同埋佢為劇集唱嘅主題曲。「經過那些年～」如魔咒一樣，長期縈繞喺大家腦海中，就連音樂才子王梓軒都為歌曲改編做英文版，親自唱出「After all those year～」畀外國人都識聽呢首偉大歌曲！至於汪明荃喺劇中飾演嘅女主角華芳凝，係一名拋棄過子女嘅資深歌手，交足內心戲之餘，仲頻頻喺劇中勁歌熱舞。拒絕交Hea貨嘅汪明荃，每次跳唱都全情投入架，絕對拍得上後生仔！有網民仲話：「啲後生仔跳舞都喘氣啦，汪明荃反而冇喘氣！」

網民就製作出心目中理想嘅得獎名單，喺《萬千星輝頒獎禮》上就係咁嘅：

視后：汪明荃

最受歡迎電視女角色：《華麗轉身》華芳凝

最佳劇集：《華麗轉身》

最受歡迎劇集歌曲：《華麗轉身》主題曲「華麗轉身」主唱：汪明荃

至於喺《勁歌金曲頒獎禮》上，就係咁嘅：

金曲金獎：「華麗轉身」主唱：汪明荃

最受歡迎女歌星：汪明荃

哇！總共有6個獎，汪明荃簡直係演藝界嘅神話！汪明荃一向都受網民注意，之前佢喺演唱會上翻唱楊千嬅經典歌《少女的祈禱》更成為一時佳話，當時佢一身日本和服Look登場，七情上面演唱。一唱到「用兩手遮掩雙眼～專心禱告～」時，汪明荃都做足動作，將雙手遮掩住雙眼，投入如此，唔怪得全場動容，就連同場嘅楊千嬅都當場感動落淚！此外，佢喺成人奶粉廣告上爆出一句「嚇死人咩！個心都離一離呀！」更加係網民嘅萬能Key！汪明荃不但多年為演藝界貢獻，近年更為網民提供咁多樂趣與創作空間，不得不畀個叻佢！

網民有話兒：

相擁XX：汪明荃係勁歌瘋狂唱，經過那些年～～畫面太美不敢想像

BXXk：我想睇阿姐首奪最受歡迎女歌星多過視后

IXXX得逃大：支持明全BB

XXX親戚：記住唔好得個推，請立即用電話下載tvb fun，全力支持汪明荃，用埋老豆（竇）老母個電話投票，今次場仗好難打，希望各位幫手！

我有畀XXX：鎂光燈中發亮，不可觸摸的一位偶像

_jaXXXs：推到狂汪明荃做大贏家

CL XXXung：好欣賞汪明荃，佢咁既（嘅）細紀咁既（嘅）地位仲去跳舞，仲要跳得唔錯（唔好比年輕果（嗰）啲，韓國果（嗰）啲，你搵個年過六十嘅人去比)，你可以見到阿姐係努力同不斷挑戰自己。真心佩服！

florXXXe628：佢差唔多70歲...仲要又跳舞又唱歌... 真係幾佩服佢...問心個（嗰）句，到自己70歲...未老人癡呆都偷笑啦....