蔡潔雯宣布已做人妻　19號補擺喜酒

前港姐蔡潔雯（Rubyanne）出席婚紗展活動，並大爆將於本月19日與拍拖4年男友結婚，心情相當開心，對方從事自家的IT生意，並表示為大婚努力減肥中：「19號會係港麗擺酒，大家都知我選港姐嘅時候都係有肉地o架啦，所以減肥係我嘅大煩惱，成日愈減愈肥，依家試緊新嘅treatment，好舒服咁減，又唔使節食，2個半月減咗20磅啦。（有冇試過用極端方法減？）梗係有啦，可以話除咗開刀、抽脂嘅方法，我真係乜都試過。（有冇咩副作用？）個人好喘氣，面部皮膚又唔好，係咁生痘痘，仲會情緒好差，試過係咁亂食嘢。」

婚後繼續做嘢

問到婚後是否會做少奶奶？她說：「唔會呀，我希望係繼續做嘢，其實我哋11月已經係關島簽咗紙，仲係嗰邊搞咗個迷你婚禮，有大約30人參加，而19號係香港會擺28圍，請我嗰屆嘅香港小姐同幕後功臣。（會去邊度蜜月？）未決定，本身有諗過去希臘或者西班牙，但歐洲依家好危險，所以唔會去啦。（係咪會造人o架啦？）畀我瘦多一年半載先啦。」