【拍拖一周年】狄易達向女友發愛的宣言

歌手狄易達在九展舉行演唱會，全晚邀得三個單位的嘉賓上台合唱，首先是師妹曾詠欣，兩人拖手合唱《我要我們在一起》，唱畢兩人攬攬。之後達仔在台上換衫兼換鞋，此時好友林穎彤送上公仔，令達仔感驚喜，然後達仔拿出結他自彈自唱《Singalongsong》，亦謂入行初期無錢，曾獲方大同送贈結他。而唱到《Be alright》時，他突然轉講普通話，粉絲即起哄，他就示意叫大家安靜，之後繼續表示：「這首歌對我很重要，昨天是我們一周年，我們不多機會見面，但很感謝妳從來都很堅強面對想念，我就像當兵一樣，一個月沒回來，但感謝你對我的支持！」實行向到場女友吳亞馨發表愛的宣言！

之後達仔自彈自唱《陽光燦爛的日子》，嘉賓周國賢（Endy）出場合唱，之後Endy謂：「喺達仔出道個年，我喺啲騷都有見過佢，印象深刻係達仔唱歌同跳舞都好有自己style，見到佢跳舞我成個人就會變到好細，而且好多人都話我地似樣。」達仔亦感謝Endy為自己寫了《好情人》，之後兩人合唱此曲。

EO2舞台聚舊

唱到《發現號》，達仔跪低答謝跳舞學校的一班師弟妹及師父支持。之後久未合體的EO2以嘉賓身分現身，四人先唱慢歌，之後再跟達仔一起跳唱快歌，Eddie亦跟觀眾打招呼：「好耐冇見啦！」然後四人跟達仔抱抱後便下台。唱到《一凍一熱》時，粉絲紛紛企起身，達仔亦使出側手翻，掀起全晚高潮。

女友感動落淚

尾聲時達仔在台上有感而發，感謝經理人多年來沒有放棄自己，之後他更忍不住哭：「真係唔捨得，淨係做一場，好怕冇得再唱歌跳舞，怕做完演唱會之後就要一直拍劇到天昏地暗，但我會盡力做好每件事，無論將來點都好，希望下次開演唱會可以見到你哋！」之後便唱出《高山低谷》，歌迷紛紛拿出手機當螢光棒，女友亦感動流淚，最後演唱會圓滿結束。