出埠睇騷　周柏豪遺憾未能送婆婆最後一程

歌手周柏豪到電台宣傳新碟《Roundabout》，柏豪表示因為自己向來喜歡駕駛的自由感覺，又覺得車內的細小空間好溫馨，所以一直都想用車做主題：「不過紅綠燈又用咗，司機又有人用過，所以我就有迴旋處，因為新碟有兩首歌《天下大亂》同《相安無事》係Battle，人生有時就好似迴旋處咁，會猶疑出唔到去，有時出到去又會錯過啲路口，不過通常到最後都係條條大路通羅馬。」

講到在馬路上的趣事，他表示：「新牌嗰時會高估自己，試過無油到喺公路到停咗，仲係喺油站100米附近，好彩最後行返，捱到去油站。」他又講到人生有個遺憾是當年在婆婆做手術後去了台灣睇演唱會，結果錯過了送婆婆最後一程的機會：「婆婆想我大個可以開心盡力做自己鍾意嘅工作，我依家係做到，但臨走時唔喺佢身邊係一個遺憾，都係一個返唔到轉頭嘅路口。」