韓春離世　盧惠光難忘與對方合作

成龍於微博公布「成家班」成員韓春的死訊，表示於片場趕戲期間突然收到一個噩耗：「我成家班的好兄弟韓春離開了我們，難怪前段時間，他一直躲著（着）不見我們...我這個兄弟綽號"斬崩刀"，曾為成家班立下許多汗馬功勞。」

韓春師弟盧惠光透過電話稱，最後一次乃數月前探望對方，又謂韓春於兩年前起受肌肉萎縮症纏繞，他說：「我哋盡量幫佢搵醫生，好多醫生話免費幫佢醫，但都話冇乜信心，之前醫生都話冇得醫。」

盧惠光又坦言為對方的離世感到難過，透露探望韓春時精神仍不錯：「當時佢話唔知幾時（走），聽到我哋都眼濕濕，不過佢好樂觀，大家都有定心理準備。（早前避見大家？）係，佢唔係好想見人，因為我哋想佢出街見下人會好啲，但佢話自己知自己做緊乜，知道自己唔係咁理想，唔想辛苦班兄弟扶佢上落樓梯，聽到個心都好唔舒服。」盧惠光表示最難忘跟對方合拍電影《環遊世界八十天》，兩人於泰國取景兩個多月，每次收工都相約食飯、傾偈，好開心。

據資料顯示，出生於1963年的韓春，終年53歲，曾擔任武術指導及動作導演的作品，包括電影《截拳道》、由趙文卓、呂良偉、蔡少芬主演電視劇《七劍下天山》、由謝霆鋒、洪金寶和元彪主演電視劇《詠春》等。