網民熱話：靚女梁茵「六隻腳趾」嚇親人！

又到聖誕！歌都有得唱：Lonely,Lonely christmas！冇拖拍、冇人約嘅「宅男」梗係照舊「宅」喺屋企，雖然聽落好似好寂寞，但就有網民發現平安夜同聖誕節嘅休閒娛樂節目特別好睇，好窩心咁大派養眼嘅聖誕禮物，請大家食「冰淇淋」！網民話晏晝就有《都市閒情》，夜晚就有《東張西望》，唔怕過Lonely christmas呀！

尋日嗰集《都市閒情》就講聖誕變身三部曲，搵嚟靚女梁茵示範3套唔同風格嘅聖誕造型，雖然造型唔係特別性感，但係梁茵甜美嘅樣貌已經令一眾網民暈晒大浪，尤其係其中一套梁茵戴住頭飾，十足十古典女神咁，獲得網民一致好評！除咗有靚嘢睇之外，呢集都有笑位㗎，有網民發現有一幕鏡頭Cloes-up梁茵啲腳趾時，因為角度問題，搞到佢好似有6隻腳指咁，嚇咗觀眾一跳！有網民就話平時好少睇電視，所以即刻要上網Search吓到底梁茵喺邊度彈出嚟，發現原來藝訓班出身嘅梁茵間唔中都有拍電視劇，不過都係一啲小角色，但重點係佢依家先21歲，仲有大把世界㗎！

而今日，聖誕節正日嘅《都市閒情》亦有唔少網民收睇，主持之一彭慧中無懼天氣轉涼，着上短裙大騷美腿，而且雖然佢件衫包到上頸，但依然遮掩唔到佢驕人嘅上圍，睇到「宅男」眼都凸埋，大讚佢有樣、有身材、有腿呀！

至於《東張西望》尋日平安夜竟然教大家練腹肌，搵咗三圍為32.5C-22.5-34嘅陳庭欣（Toby）示範健身動作，着住運動Bra Top嘅Toby一趴低，就露出事業線，網民都話估唔到原來喺屋企睇電視都咁多樂趣！

網民有話兒：

古xx：「毒」自在家有梁茵陪過平安夜！

ocexxxx：梁茵女神look勁正！

寸x：hahaha～6隻腳指（趾）嚇死我～

buxxxtxx：彭慧中條腿真係世界級！

田ｘ田：估唔到東張西望有陳庭欣做運動睇，可以做耐啲就好啦～～