Twins重返校園拍MV

Twins即將於紅館舉行跨年演唱會，除了密鑼緊鼓排舞練歌，兩人亦抽空為新歌《虛齡時代》拍攝MV，新歌由伍樂城作曲，黃偉文填詞，是Twins自第一首歌《明愛暗戀補習社》開始的夢幻組合，而歌詞中更提到只要心境依然，青春自然得以保存，年齡這數字自會淪為虛幻。在MV中兩人更會踏上奇幻升降機，回到充滿回憶的地方。

由昔日的「先生好校長好」，到踏入社會的種種改變，為了勾起青春那股被封存的熱血，導演特意從Twins的MV中選出經典場口，當日包括讓人印象深刻的《女校男生》的班房及《風箏與風》的山丘。

而在拍攝期間，Twins亦講到回憶依然歷歷在目：「最記得拍《風箏與風》時，我哋仲係短頭髮，所以MV入面嗰把長長嘅曲髮，係用咗5個小時駁髮嘅成果，為嘅係一個3分鐘嘅畫面！」而在校圍拍攝時，兩人更提住攝影師一齊走勻不同角落，即興影一輯沙龍，又大擺孖妹甫士，可謂回憶滿瀉！