陳國峰求婚 老婆戴唔落鑽戒勁搞笑

20151229
東網電視
更多新聞短片
陳國峰呢個求婚場面,真係好精彩!
憑《超級巨聲2》加入娛樂圈發展嘅陳國峰,以大隻聞名。而佢趁2015年呢個喜慶年,趕尾班車成功向拍拖多年嘅女友求婚,仲有朋友幫佢哋拍片現場直擊,而個場面,可以話係既浪漫溫馨而又相當搞笑。
女友心急伸手
條片嘅開首,着得西裝骨骨嘅陳國峰,拎住紮花chok爆咁出場,之後佢喺浪漫歌曲嘅襯托下,向女友跪地同埋拎咗隻求婚戒指出嚟。呢個時候,佢女友已經哭成淚人,表情相當肉緊、激動同埋感動。雖然要騰隻手出嚟抹眼淚,但佢女友依然一度心急到伸隻手出嚟,陳國峰見狀即時接招,將預備好嘅鑽戒套上女友手,呢個時候,搞笑嘅畫面出現喇,就係隻戒指竟然戴唔落,卡咗喺無名指嘅關節位度,現場即時充斥笑聲。
除衫晒麒麟臂
而早有心理準備隻戒指未必啱戴嘅陳國峰,都盡力咁將戒指套落女友隻手,仲講咗句:「戴住先。」雖然有呢個小插曲,但依然無阻二人嘅喜悅同熱情,佢哋嚟個當眾咀嘴,場面相當浪漫,唔知係咪太興奮,陳國峰尾段除咗件西裝外套,雖然着住恤衫,但衫入面嘅麒麟臂依然清晰可見。而呢個咁精彩嘅求婚過程,亦都隨住佢哋向賓客表達謝意嘅時候而圓滿落幕。
陳明恩被求婚
而喺差唔多同一個夜晚,大概隔咗幾個鐘咁啦,現年34歲嘅陳明恩,都喺臉書宣布被求婚成功,鬼咁甜蜜上載佢同未婚夫合照之餘,仲話激讚老公各方面都係好好好好嘅男人,冧到哩!