吳業坤以公屋仔為榮:我唔會自卑

20151231
東網電視
更多新聞短片
唔介意畀人標籤為「公屋仔」,仲話公屋好有人情味,幾多錢都買唔到!
於樂富橫頭磡邨長大的吳業坤,從不介意草根味濃被標籤為「公屋仔」,自言在赤貧線上浮游的坤坤坦言因冇錢而被迫放棄愛情,「上車」置業看似遙不可及,卻是最實際的目標。坤坤說:「如果你覺得去到谷底,其實你冇嘢輸,要達成目標乜都唔駛諗,唔好怕輸!
我係公屋仔
自嘲零星味的坤坤人氣猛升,明顯毫不習慣,連日來出入樂富橫頭磡的住所,都是戴着口罩頭耷耷。即使日前坤坤在屋邨接受訪問,男女老少連聲叫他「坤哥」並主動找他合照,甚至行經幫襯多年的麵包店,店員和顧客大讚:「你好嘢!」、「掂呀!」,他都是腼腆的插着褲袋一副宅男本色,但仍親民的有求必應。坤坤話:「依家多咗人關注,少咗私人空間,都感受到少少壓力,出街都會包到自己實一實。我唔係介意畀人知我住公屋,我係公屋仔,有乜所謂,事實嚟㗎嘛!住公屋好輸蝕失禮咩?淨係人情味,幾多錢都買唔到!」
買樓畀間房阿媽
雖然對自小長大的樂富有一份不能形容的感情,但是「上車」買樓,一直都是坤坤的目標。「媽咪一直都未有自己一間房,至少都畀番間房佢吖!依家妹妹同媽媽一間房,我自己一間,對我好好㗎嘞。我同好多香港人一樣都想『上車』,呢個經濟體系好成熟,但又感覺上好難搵到一個突破點,我依家都未站得住腳,都係虛幻feel,條路好似冇乜嘢揸得實,名氣係可以隨時飄走,我唔會生啲錢出嚟,係人哋消費我先有。做多五年都未必會再紅啲,又唔會升職,聽日我可能畀人扔死呢!」
我未做過MK仔
坤坤說從不介意被稱為「公屋仔」,童年回憶就是屋邨附近的球場,這天坤坤來到球場,指這指那話當年,「中秋節會去摩士公園,好熱鬧㗎,依家少咗嘞!遊樂場嗰邊啲鞦韆冇晒,依家太錫啲小朋友,乜都覺得危險。個球場咁耐以嚟都冇變過,只係人同事變晒,起碼唔會再有咁多小朋友喺到打波。以前我喺到識到好多朋友,朝早六七點落嚟打,當時大家都冇電話,但都可以齊人,呢個年代已經做唔番!最記得,係有晚打波,有班古惑仔喺上面追住幾條友,我當堂嚇親,但又覺得好壯觀,好似啲野生動物大遷徙咁!依家邊有古惑仔!唔興啦!依家興MK仔!我未做過MK仔喎,睇我依家咁就知啦!」
做籃球隊隊長
講開籃球,即席示範入樽的英姿的坤坤說到眉飛色舞,「細個嘅娛樂就係籃球同打機,我係龍翔道官立中學籃球隊隊長,因為覺得好勁,人一世物一世,點解唔試吓做隊長?當時又冇人肯做隊長!讀書時都算多人識我,又打波又參加sing con(歌唱比賽),我係做學生會外務部副主席,係因為冇人做。以前啲學生真係好壞,老師都驚,我都估唔到我可以生存到。」
唔介意做「宅男」
坤坤的簡單及戇直,以現在的潮語一字蔽之「宅」。坤坤說從不介意人家笑他「宅男」甚至「戇男」。「入行之後我都係宅男嘅,呢樣係本質,即係我好隨性,唔思考或計較太多。(會易被利用?)我唔敢講係利用,例如我講咗某啲嘢畀人聽,原來對方係想套我料囉!其實都冇證據,都係算啦。」算靚仔一名嗎?坤坤說:「順眼囉。我都唔敷mask,你讚我皮膚好,弊在我左邊爛面呢!應該係壓力瘡,呢兩三年有無形壓力,呢個世界好複雜。」
自言唔易喊的坤坤,曾匿在車廂爆喊,「喺車聽返自己首歌嘅demo,覺得終於出歌嘞!諗起好多嘢加加埋埋,自己戇居居咁喊咗。最開心係有碟出,最遺憾係冇得去《中國好聲音》。出面話我可以挑戰Eason(陳奕迅),太太太太太太抬舉我,佢係我偶像,未必要挑戰佢。唯一一次見佢,係喺Eric Kwok個騷嘅後台,我貿貿然走埋去話想合照,同Eason只係講咗句:『我叫阿坤。』因為我好驚,驚到好似第一次上台咁。」