冇同鄭嘉穎打招呼　周麗淇搵對手生仔

藝人周麗淇（Niki）出席探訪保良局活動，她表示可於2015年最後一日參與極具意義的活動感到高興：「我打算喺2016年再做多啲探訪。（暫停搵錢？）唔可以咁講，搵到錢都要捐同助養兒童，唔可以成日賺錢，要回饋，我自己都有助養2個內地小朋友，一仔一女，10幾歲讀緊大學啦，由小學供養到大學，不過佢哋係有父母嘅，我負責供佢哋讀書，佢哋都有寫信畀我，大家有見過嘅！（每年捐幾多錢做慈善？）冇㗎，我都幾廣泛，之前都捐錢喺內地建學校，用我嗲哋個名起，今年都想用媽咪個名建多間，有周氏家族嘅學校，教育真係好緊要，喺呢度嘅小朋友，佢哋有父母嘅，都係因為屋企有經濟同家庭方面問題先寄養喺度，所以要有捐贈者畀佢哋去學英文同國語，我嚟緊都會低調地去內地做探訪，香港就會自己嚟探小朋友。（建學校要捐幾錢？）多有多捐啦，心意，唔好講幾錢。（6位數？）冇計算過，幫吓人。」

等男人送上門？

至於今日除夕，Niki表示會留港倒數，及跟朋友一起吃飯度過，並笑言：「唔好搞咁多嘢啦，希望平穩度過2015年。（有咩新年願望？有新男友？）隨緣啦，好多人都問我要唔要幫我安排飯局，特別喺呢啲大時大節，我話唔使啦，我比較怕，好怕刻意，我覺得如果緣份要嚟擋都擋唔住，好似門鐘㩒錯就會嚟到你門口咁，所以感情呢樣嘢隨緣啦，新一年最緊要身體健康，而我2016年多數都會喺內地做嘢，最想多啲時間陪屋企人，自己成日喺出面，會好掛住佢哋。（幾時到你養自己嘅小朋友？）要搵番個對手先，一步步嚟，依家屋企集中力畀晒家姐囝囝，所以屋企冇壓力，希望家姐快啲再生多個，我就更加冇壓力。」

同鄭嘉穎隔好遠？

Niki希望新一年可嘗試拍更多不同種類的戲，又謂剛才同場的米高積遜（MJ）三哥Jermaine Jackson（杰明積遜）邀請她參與主唱其創作的新歌及拍攝MV，大感榮幸。問到早前到胡杏兒婚禮有否見到舊愛鄭嘉穎及打招呼？她說：「其實我同佢離好遠，隔幾張枱，有見到，但冇特別打招呼，又唔係第一次見到，焦點放咗喺呢度，搞到我去杏兒婚禮都覺得唔好意思。」

最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。如果鍾意韓風嘅，集中介紹最新韓劇、韓片同韓國最新歌曲嘅《韓劇榜》，同埋Highlight每周韓星訪港精彩片段，以及報道韓國演藝圈最新動態嘅《韓風吹》絕對啱晒你。仲諗咩呀！快啲Download啦！

最強娛樂APP「東網巨星」下載連結：

　http://on.cc/redirect/entertainment