自由身徐子珊透露正同電影公司接洽

藝人徐子珊在鑽石山一間商場出席倒數活動。問她是否獻唱代表作《Hit Me》，她就笑謂較想唱新歌：「練咗隻歌㗎，仲自己扲錢請咗兩個backing singer喺度唱，多啲氣氛。（會出碟？）你好想我出碟咩？我諗唔會喇，16年都係諗住電影，或者試下真人騷、綜藝節目。」同時亦會繼續設計珠寶，更指12月推出的系列已賣出8、9成：「有人要落柯打再訂，好開心，我哋已經籌備緊下一個Collection。」

問到如果參加內地的真人騷會否怕有意外發生，徐子珊就指不會擔心太多：「都要研究下係點先。」最怕只是到荒山野嶺遇到蛇蟲鼠蟻。而現時自由身的她亦透露正與電影公司、內地經理人公司等接洽：「但依家自己接Job都非常之好，所以都唔心急。」談到2016年願望，希望多作嘗試的她就指自己恨做舞台劇：「成日聽人講做舞台劇嘅經驗係開心嘅。」又指想繼續做好珠寶設計。問她會否在感情方面都有願望，她即笑謂：「好次要啦呢樣嘢！」亦沒有特意去結識異性：「又唔係一定要生BB，冇乜所謂！」