BOP拓展財路　Gordon賣有機菜

三人男子組合BOP天堂鳥昨晚出席上水廣場倒數活動，跳唱兩首快歌Chok晒舞技，冧得台下女Fans嗌到拆天！

三子表示2015年花了幾個月時間在內地工作，希望新一年多留港開工見Fans：「我哋好掛住香港Fans！佢哋都等咗好耐喇！所以呢晚反應咁好！2016年計劃出新碟同舉行音樂會！」

BOP直言正努力開拓財路，成員Gordon透露最近投資六位數，跟圈外友人搞有機菜生意，Lincoln及Tyrese大表支持：「冇預我哋都唔會嬲，佢投資賺到錢，再請我哋做代言人就得！」Gordon笑說：「我搵到即係佢哋搵到！」Tyrese笑言為寄賣Gordon的有機菜會投標年宵攤檔。