娛樂專題：高海寧潮整空氣劉海變韓妹

高海寧早前到韓國首爾旅行兼探望已嫁到當地生活的好姊妹Winnie，她最推介是到高級髮型屋剪髮，一試百分百韓風的「空氣劉海」造型，埋單也只五百多元，十分抵玩！

高海寧（高Ling）有嫁到韓國的好友Winnie帶路，在首爾遊玩自然可以更地道。最令高Ling期待的是今次能到韓國高級髮型屋變髮，她說：「因為韓國人用英文溝通唔係咁普遍，所以唔識韓文去髮型屋剪頭髮就有啲困難，今次有Winnie陪我，佢識韓文就終於可以試吓。」

高Ling去到清潭洞一間高級髮型屋剪髮，這間髮型屋大有名堂，連韓星宋智孝、孫藝珍和朴信惠等都到這裏整頭。高Ling對韓國髮型師的技術讚不絕口，而且價錢十分抵玩，她說：「香港都好興韓風髮型，但係因氣候同濕度問題，香港好難整到十足韓國味道，好似髮型師幫我整呢個『空氣劉海』頭，喺首爾無論點大風大雪，髮型都可以保持好耐，香港濕度高好難保持，埋單都係五百幾蚊港幣！」

高Ling此行有「地膽」帶路，自然避開東大門、南大門等人多的旅遊熱點，她特地選擇到有不少明星開設咖啡店的清潭洞逛街歎咖啡，及到江南區吃地道燒烤，她說：「呢間燒烤最特別係燒烤前會畀一碗水你浸飯焦，浸完有啲似粥咁，香港我就未食過，同埋佢哋啲韓牛肉味真係好濃郁，但價錢有啲貴，兩個人埋單要千幾蚊港幣。」另外，她還跟友人出席當地婚禮，增廣見聞。