Twins尾場騷農夫現身搞gag　祖兒睇到喊

出道15年的Twins完成一連五場在紅館舉行的《Twins LOL Live in HK》演唱會，尾場吸引大批圈中人捧場，有好姐妹容祖兒、李克勤與太太盧淑儀、林峯與女友吳千語、關智斌、黃偉文、老闆楊受成夫婦都有睇騷。而Twins勁歌熱舞唱《愛情當入樽》時，阿嬌被舞蹈員捧起做倒轉動作時疑似跣手，幸好只是撞甩阿嬌帽子。

同農夫唱《士多啤梨蘋果橙》

至於最後一場Twins請來農夫做嘉賓Rap住唱《士多啤梨蘋果橙》，農夫向Twins大獻殷勤為Twins在升降台上整理裙擺，到Twins返回後台，農夫才放肆說：「佢哋叫我哋唱自己歌喎，肯定全部去屙尿啦，我哋唔會咁做，我哋Keep住你哋急尿嘅狀態先。」兩人又提到當年擊敗Twins奪最喜愛組合，事後被網迷狂插，C君謂：「我有理由懷疑班寫衰我哋嘅人今日都坐喺現場，我哋經歷咁多年，乜嘢風浪未見過，我唔驚你，你哋Twins Fans嘛，我同你講呀…對唔住。」C君更隨即跪地笑爆全場。

Encore勁感性

在Encore時阿Sa感性向台下歌迷說：「希望若果有一日有人問你哋偶像係邊個？你哋可以好Proud of講係Twins。」期間坐在VIP席上的老闆楊受成身旁的一位男士更拿着大束玫瑰花走到台邊送給阿Sa。

祖兒勁high　阿Sa你係咪飲咗酒？

而Twins唱《戀愛大過天》時，台下歌迷都高舉寫上「一世都係Twins」的布條，阿Sa大呼好感動。阿Sa稱這晚是進行錄影會唱更多歌，示意演唱會會唱到超時要請老闆楊生找數，之後Twins點唱環節請祖兒上台，鏡頭捕捉到祖兒全晚表現都好High，由開場到最尾祖兒都企足全場欣賞兼跟住唱，期間更見她為Twins感動落淚，而祖兒走到台上與阿Sa阿嬌「龍虎豹」合體，阿Sa見祖兒High爆又臉紅紅，笑問祖兒：「你係咪飲咗酒？」祖兒說：「我冇飲，我想講要代表全場多謝你哋，將我哋全場拉番去16歲，有一刻我係不停喊，我哋算係一齊經歷順境逆境，見到咁多人鍚你哋好開心。」說畢祖兒即爆喊，阿Sa再笑祖兒一定飲醉酒。而祖兒提議合唱《你講你愛我》又捉台下關智斌（Kenny）上台幫手用手提電話拍「網上直播」，祖兒邊唱邊周圍跑又扭籮跳舞，跟住說要唱《眼紅紅》，當唱到歌詞「依然我愈說愈激動」祖兒更揸緊拳頭跪晒地演唱，阿嬌笑言：「妳真係好激動喎！」唱完三人再擺出「龍虎豹」的Ending甫士相當搞笑，而祖兒笑言：「我可唔可降番落台有氣派啲呀。」但阿Sa、阿嬌和Kenny則不理疑「飲大咗」的祖兒要求便扶她落台。之後Twins點唱了多首歌曲，最後唱出《女校男生》來結束演唱會。