【同動L唔同命】滄海遺珠－陳柏宇

歌手吳業坤2010年參加歌唱節目《超級巨聲2》而入行，不過星途一啲都唔平坦，直至去年簽約做歌手出碟，就即刻勇奪多個新人王獎項，仲喺叱咤頒獎禮橫掃三個獎，昔日嘅棋子捱咗5年，終於吐氣揚眉。坤坤呢期紅到發紫，網民不禁諗起同樣好唱得、亦出過唔少代表作嘅陳柏宇（Jason），大家都發生過疑似「動L」事件，不過Jason由2007年出道至今都只係紅歌唔紅人，網民就為佢感到不值，大嘆佢懷才不遇，仲封佢做「樂壇隱世高手」!

多年來Jason都唱出過唔少膾炙人口嘅情歌，好似《固執》、《I Miss You》等，2009年歌曲《你瞞我瞞》一出，即刻唱到街知巷聞，網民都大讚佢唱慘情歌唱得好到位好入肉，此曲亦令Jason拎咗唔少歌曲獎。

當年佢喺一個簽唱會上演唱呢首歌時，仲發生疑似動L事件而引起網民熱烈討論，有網民更將《你瞞我瞞》改詞去紀念呢件事，不過Jason之後喺樂壇嘅成績就再冇大突破，去年Jason推出嘅大碟《Escape》大受網民好評，仲大讚佢Keep到出道初期嘅水準，不過多來年都冇乜機會奪歌手獎，網民仲話同佢同期出道嘅周柏豪機遇就大大不同，近年已成功躋身歌手獎三甲，更越級挑戰歌神陳奕迅，喺2014年度叱吒頒獎禮勇奪男歌手金獎，2015年度亦獲男歌手銅獎，相反Jason近年就喺叱吒頒獎禮冇咗影。雖然網民戥Jason唔抵，覺得佢絕對有資格問鼎歌手獎，不過亦有網民鼓勵佢話獎項並唔重要，最緊要係繼續唱好歌喎。

網民有話兒

Rixxx Mxx:其實佢唱歌真係好好聽，係啲人實在唔識欣賞

Natxxxx Ip:其實佢由出道開始D（啲）歌已經好好聽

Zoxx_nx: 一粒滄海遺珠，D（啲）舊歌翻聽再翻聽再翻聽再翻聽

Jaxxx Chxxxg: 佢係唱得既（嘅），但比（畀）人忽視得好緊要

Katxx:陳柏宇把聲好冧，真不愧為樂壇隱世高手