羅啟新證《晨光第一線》年輕化大換血

電台長壽節目《晨光第一線》盛傳「大地震」，人事變動，主持的DJ羅啟新（Couson）接受訪問，對於節目「大換血」一事，他說：「改節目囉，年輕化啲。（多聽眾反對？）我諗係感情啦，因為原來我喺度做咗廿五年喇，依家離開廣播呢個行業，去咗電視部個邊，所以有啲聽眾會唔慣，2004年開始做《晨光第一線》，變咗有好好嘅感情，大家會唔習慣囉。」他又坦言自己亦不捨得離開：「無啦啦有班朋友喺空氣裏面，出街嘅時候有素未謀面嘅人，但當咗你係朋友，呢啲朋友你要同佢哋講byebye囉。」問到是否突然通知？他透露一個月前已知道：「不過唔係由我哋公布。（最後一日？）我仲有兩日，last一日係1月8號。不過咁啱1月8號我哋幾個老嘢say goodbye，但何嘉麗1月2號就飛，佢放假，咁啱一個月前鵬仔（程振鵬）病咗入咗醫院，變咗啲聽眾覺得冇晒人咁。」

「用另一個方式吸引年輕人」

至於可擔心新主持沒有人收聽？Couson說：「佢哋新嘅年輕人，佢哋個世界唔同我哋，我哋以前做嗰套，經過咗咁多年，可能都要試下啲新嘢，做廣播就算唔係提早轉去第二個部門，可能有一日退休咁，可能又有人唔捨得。（聽眾群唔習慣？）呢個唔係我決定。（你嘅聽眾群？）我嘅聽眾群好得意，啲後生女見到我就會話佢阿媽聽，後生仔嗌我就因為頭條新聞，會嗌你小生，唔會嗌你Couson，有啲聽咗廿幾年，未畢業就聽，咁我都保養得幾好。最初設計個節目係想攞最多嘅population，依家都要有啲革新，唔係我去擔心我哋嘅最大competitor（競爭者），對可能後生仔嚟講唔係其他嘅電台，係佢哋部手機，會唔會佢哋可以用另一個方式吸引年輕人呢？」

至於收入可有受影響？Couson表示沒有，又指自己有一隻腳已經過了電視部做宣傳總監：「可能台長覺得依家係一個成熟嘅時間，去到換一班人上嚟，咁啱個潮流係咁，好多地方都開始要人接棒。」