RubberBand撐阿正為老婆秘撈

樂隊RubberBand（RB）出席新專輯宣傳，即場演繹多首歌曲，身為唱片監製王雙駿、音樂人恭碩良、樂隊Yellow等齊來捧場，主音6號太太及結他手阿偉愛女亦現身打氣，6號唱到欲罷不能，自我Encore。

新婚的阿正（馮庭正）被問為何太太黃淑玲沒有出現？他說：「佢去咗做瑜伽，話運動緊要啲。」對於有指黃淑玲即將推出由他監製的專輯，阿正大方地說：「你哋又知？係呀，未知幾時。（做監製冇得話佢？）我唔敢話佢，所以好難做。（交畀其他成員做？）唔放心交畀佢哋，加上今次有少少爵士，自己貪心啲一個試吓。」而鼓手泥鯭（黎萬宏）支持成員出外秘勞，他說：「監製唔同嘅嘢，帶多啲新嘢返嚟，對我哋有得着。」

阿偉玩手機被鬧

另外，阿偉自爆錄音時因為玩手機被監製鬧，他公開認錯：「係我哋唔啱，唔夠集中。」而6號（繆浩昌）承認每次唱Live都會當作最後一次演出，身旁的的阿偉則說：「今次佢好叻冇喊。」