李小龍情人　苗可秀剖白：係命運安排！

藝人苗可秀接受電台節目主持人梁泰來訪問，談及在演藝事業高峰時與李小龍合作拍了《唐山大兄》、《精武門》及《猛龍過江》三部電影，二人的緋聞亦因此不脛而走。苗可秀說：「李小龍畀我嘅印象係好頑皮，經常捉弄我。或者因為《精武門》我哋有一段接吻戲先會傳緋聞吧！（真Kiss？）當然真！從戲中可以睇到。（你是第一次真正拍接吻戲？）係，當時我哋大家都緊張，工作人員都睇實我哋，不過我哋做足準備，大家不停噴口氣清新劑，佢又噴、我又噴。（有冇NG嗎？）好似係一Take…兩Take，我記得當時再NG時，羅維導演話：『夠喇！夠喇，夠喇！』因為導演好錫我，怕我蝕底。」問由此終可有感到被李小龍追求過？苗可秀猶豫了一會說：「點講呢？我只能話……冇！哈哈哈！」

成日本粉絲永遠的女神

1973年李小龍於女星丁珮家中猝死，苗可秀黯然說：「可惜…可惜！當晚一位新聞界朋友打電話畀我，當時我唔相信！點會突然？因為我好耐冇見佢，只知佢拍緊《死亡遊戲》，我立即打電話去佢屋企查問。」當時接電話的是一名電影公司老闆，並承認了李小龍的死訊，苗可秀當時好傷感，哭得很利害。

李小龍到今天仍是傳奇，苗可秀說：「佢好獨特，直到今日仲有好多影迷愛戴。甚至我今日到日本或者其他地方，日本影迷都當我係女神，真係叫我女神……早排我到日本見導演同監製，佢哋同我握時緊張到雙手都有汗，更試過跪拜我。」

年少輕狂愛不能自拔

除了李小龍之外，苗可秀入行以來多次跟有婦之夫傳出緋聞，她更曾於訪問中承認曾與有婦之夫相戀，她說：「我覺得係命運安排，我冇刻意搵呢啲人，係雙方嘅。（你冇阻止自己？）有，但我阻止唔到，要發生就會發生。當然，有部分責任喺我身上，但當時情形，大家開心，阻止唔到。（不能自拔？）應該係！」

苗可秀直認年輕時「任性」，父母朋友曾經勸止，不過她強調從沒要求對方離開太太：「絕對冇。（點解？）只可以話自己蠢，如果真係要破壞人哋家庭嘅第三者就唔會咁樣，可見當時冇深入想清楚，單純覺得大家快樂，佢對我亦好好。」

「唔知柯俊雄欠我乜」

於去年底因癌症病逝的台灣影帝柯俊雄，當年跟苗可秀的緋聞亦哄動港台兩地，柯俊雄曾於訪問中說過：「一生最虧欠的女人，就是苗可秀。」問可知對方說過這番話？苗可秀淡然的說：「是嗎？嗯……後嚟有人話過畀我聽，但依家冇所謂啦！感情呢回事，冇話邊個欠邊個，依家追都追唔番啦！如果早知道，我會去問佢：『你欠我乜嘢呢？』」

聽到柯俊雄離世的消息，苗可秀感到很可惜，認為他走得太早了，因為他還很熱愛演藝工作，她說：「我認為任何一段感情，分開只需要記住大家曾經開心過嘅日子，雙方就會無怨無恨，真係冇話邊個欠邊個。」