娛樂專題：胡鴻鈞「被整容」搜證平反

哪吒「削骨還父」本是一則可歌可泣的神話故事，惟近年成為胡鴻鈞（Hubert）被瘋狂抽水的一句網絡潮語。他被傳削腮骨，由方形面進化至V 煞面，更被大批網民聲討圍攻。

禍不及家人！眼見牽連父母捲入這場「削骨還父之亂」，Hubert 接受本報專訪時決定還自己一個清白，誓神劈願提出三大力證否認整容，再反擊一眾口痕友：「始終香港人怨氣較重，有憎人富貴厭人窮嘅心態⋯⋯為咗令成件事有說服力，可能有人Photoshop過我啲相都唔出奇！」

「V」面成箭靶

在這個充斥是非的娛樂圈，不時有女藝人被質疑僭建、整容，近年這片「被整容潮」更蔓延至男藝人身上，當中最多矛頭指向的必屬胡鴻鈞，其「削面風波」該由2010年參加《超級巨聲2》講起，雖然情節不及哪吒削骨還父般孝感動天，但每字每句亦有苦有淚……

當年二十出頭的Hubert微胖、面方， 外形與一般大學生無異，他參加《巨聲2》不敵林欣彤，屈居亞軍。後來翻唱《化蝶》為人熟悉，負面新面亦接踵而來， 網民翻炒他的比賽照作對比，指他動刀做削面手術令腮骨消失，由「方塊酥」突變「刀削面」。Hubert起初對整容新聞一笑置之，還向朋友自幽一默：「第一次睇到呢啲新聞唔會唔開心，仲會將段新聞影畀朋友睇，除非畀人話整容失敗啫，正常畀人話整容都係話靚咗。識我耐啲嘅朋友都話唔覺我有變化，但少見嘅朋友都會懷疑，問我係咪真係有整，我都會答：『咪玩啦，點會呀！』」

殊不知整容傳聞愈演愈烈，有網民發起聲討行動， 在Hubert的社交網作洗版式攻擊，留言清一色是「削骨還父胡鴻鈞」：「網上畀人攻擊後開始覺得困擾，會唔開心，點解要講到咁肉酸？話埋我屋企人，網上世界就係咁，毋須為自己嘅言論負責，始終香港人怨氣較重，有憎人富貴厭人窮嘅心態，惟有做好自己囉！雖然爹哋媽咪冇唔開心，但反而擔心我承受唔到壓力，我哋有拎件事出嚟講，佢哋都話係班網民食飽飯冇嘢做啫。」

疑有人執過相

當時網上瘋傳一張Hubert「方面VS尖面」的對比圖，Hubert質疑有人對其相片做過手腳：「開頭睇我都覺得好大分別，可能有人Photoshop過！有摷番以前啲相睇，分別都冇嗰兩張相咁大，可能有人想令成件事有說服力啲，執過相都唔出奇！」無端與「削骨」扯上關係，Hubert索性在網上搜集資料，提供三大證據力證「純天然」：「畀人話削骨喎！當然要上網Search吓係咩一回事啦！削骨手術喺整容入面係大手術，至少要休養幾個月，但我Keep住見人喎，從來冇消失幾個月，如果真係整容都要抖吓啩？其次，我見香港根本就冇得做削骨手術，最近都要去台灣做，閒閒哋都要成幾十萬台幣，我邊有咁多錢做呀？根本講唔通！」

對得人、拜得神的Hubert拒認整容，強調初出道時體重高達150磅，其後努力跑步減肥，成功踢走20磅脂肪，加上長期做Facial才令輪廓突出。但說到底，這一行始終是靠樣搵食，他坦言不排除整容： 「呢一刻冇諗過，以後嘅嘢我唔可以排除，如果真係咁後生就整容打針，唔通打幾十年咩？我賣點係歌聲，唔係賣靚仔！」

緋聞男女通殺

除了捲入整容風波，Hubert出道以來亦備受緋聞困擾，最離奇的是「男女通殺」，緋聞對象包括林欣彤、吳若希（Jinny）、鍾欣潼（阿嬌），還有……張敬軒：「我一向好欣賞軒仔，本身唔認識佢本人，點知有次去睇佢音樂劇，朋友帶我入後台同佢Say個Hi，原來軒仔有留意我《巨聲2》嘅表現，當時我膽粗粗同佢合照， 之後提出咗更過分嘅要求，就係抄佢牌，點知佢又肯喎，最後大家有WhatsApp聯絡，分享吓音樂，慢慢愈傾愈深入，佢有分享啲入行經歷我聽咁囉！」

這段粉絲邂逅偶像的故事最後演變成「HeHe緋聞」，Hubert沒好氣地說：「真係摸不着頭腦，希望軒仔唔會介意啦，緋聞男友都唔應該同我傳啦，我就冇所謂，明白呢行運作，當係則新聞睇囉，絕對冇影響我哋嘅友情，由細到大都未被人誤會過（斷背），但有新聞好過冇啦！」

吳若希「熟透」撻唔着

至於與吳若希常以情侶檔演出，Hubert明言兩人只限兄弟情， 從不過電：「同佢太熟喇！冇諗嗰方面嘅嘢，友情可以維持耐啲，大家都冇將關係再進一步，好似兄弟咁相處。」他自爆戀愛經驗不算豐富，入行前只拍過兩次拖，每段戀情都維持三年多：「我目標都係長久嘅關係，拍散拖我寧願唔拍，好嘥時間同心機。雖然呢行接觸女仔嘅機會多，但我比較內斂，對住女仔會怕醜，通常女仔撩我講嘢先， 因為驚畀人誤會我成日溝女。」

這個純情怕醜仔原來中學時讀男校，圍繞身邊的都是一班好兄弟，因而從小就不懂跟女孩子相處，甚至擇偶的首要條件是男仔頭：「同男仔頭嘅女仔會易啲溝通，不拘小節，鍾意啲有個性、豪爽，反而唔鍾意女仔太嗲。」

不過，Hubert 入行後一直守「Dry」，他坦言經營一段關係非常費心機，寧將心力放在工作上， 但有時都會心思思想拍拖：「其實唔抗拒拍拖嘅，但唔會刻意追求囉，緣分到喇都會欣然接受，咁都要調劑吓生活嘛，有時都有乏味嘅時候。」

後記：問心無愧祝「鈞」好運

小記動筆撰寫這篇專訪時，欲寫又止，一方面希望幫助Hubert 脫離整容傳聞的困擾，好讓他表達一路以來對這些負面新聞的感想，甚至是反駁。但想深一層，本文出街後或會再次觸動網民的神經，甚至發動第二波洗版式的「削骨還父之亂」！

不過，從小父母教落， 做人問心無愧， 又何懼之有呢？訪問當日，Hubert 儘管抱恙，仍出盡吃奶的力為自己平反，講到整容傳聞時， 看他理直氣壯， 聳聳肩說：「我絕對唔會心虛，我唔驚畀人話！」既然如此，祝「鈞」好運！