蕭正楠讚黃翠如悉心照顧媽咪：好女友

藝人蕭正楠（Edwin）與曹永廉以西裝Look拍攝新劇《公公出宮》宣傳片，曹永廉在劇中扮乸型，蕭正楠取笑他「乸到乸眼」。

提到Edwin早前與家人及女友黃翠如齊齊去旅行，翠如更融入蕭家，深得蕭母歡心，Edwin直言媽媽對翠如非常滿意：「睇得出翠如好識照顧人，自己比較急速，掛住搵車，翠如喺後面照顧媽咪，係好女友！（想佢做新抱？）冇講，未去到咁遠。（催婚？）自己有講過40歲前結婚，但開工開到年中，冇時間諗。（翠如暗示想結婚？）冇！」至於媽媽有否開口讚翠如？他承認「有」，而且拍拖初期已經祝福他們：「相處耐變得更熟絡。」