任賢齊做「跟班」陪老婆超市入貨

「愛妻號」任賢齊雖然和太太Tina移居香港多年，但小齊經常為工作周圍飛，在港時間不多，加上Tina全力照顧一對仔女的起居飲食，所以比小齊更熟悉及習慣香港生活。日前小齊和Tina結伴到銅鑼灣行超市，超市是女人的主場，故小齊全程只是跟到實，太太行邊就跟到邊。兩人行到凍肉部時，Tina仔細地揀選凍肉，小齊則叉腰推着購物車，一副天然呆的樣子看着太太，更一度忍唔住「放蚊」。

等到扁嘴叉腰

期間小齊因有來電而走到一旁接聽，始見他充滿活力，邊講邊手舞足蹈。講完一輪，等太太前來會合的小齊故態復萌，不時咬手指呆望貨品，又狂篤手機，等了一會兒也未見太太，小齊開始嘴扁扁又叉晒腰，其後與Tina會合才稍為寬容。小齊慢推購物車緩緩跟在太太身後，任由太太揀選貨品，只是間中上前給予意見。男主外，女主內，完成入貨任務，小齊當然負責畀錢找數，為免太太辛苦，他主動拎起大袋戰利品，更有手尾地把購物車推到一旁，見老公推車，Tina亦推埋一份，非常煙韌！