同郭富城拍過拖？方皓玟：唔知呢

歌手方皓玟（Charmaine）為TVB娛樂新聞台節目《StarTalk》擔任嘉賓，接受主播許文軒（Edmond）訪問。當中，她大談相隔四年將再次推出新專輯的感受。

唔介意被指同官恩娜撞樣

Charmaine入行不經不覺已十四年，提到其歌唱成績反不及其外貌被指似官恩娜，以及被指整容的傳聞般令人留下深刻印象，Charmaine說：「我都覺得有某啲角度似，似官恩娜冇唔開心，佢係大溪地女神，好多男仔鍾意佢，我反而驚佢嬲，有啲唔好意思！其實我冇特別扮佢，但咁樣都無端端成為娛樂新聞人物，真係多謝傳媒咁錫我！其實好多人連我個樣係點都唔知，所以我唔介意，如果我個樣同十四年前一樣，我會更加驚，鬼故咩？」

同城城好熟

談到早前被指與郭富城曾相戀並已分手，Charmaine說：「最初聽到傳緋聞時得啖笑，我好少公開講私人事，我同佢都熟，我哋有Common Friends，有時會一大班人出嚟食飯。（緋聞係真？）唔知呢？我首歌《Lady Copy》歌詞入面有郭富城個名，但首歌唔係寫畀佢，我好少寫情歌會向住一個人而寫，我寫歌亦唔會講到咁白，會留番想像空間畀大家！」

恨頒獎禮攞獎

Charmaine又分享她在新專輯的創作想法，她說：「我希望全隻碟啲歌都係自己寫，因為好有滿足感，今次隔咗四年再出專輯，雖然慢咗少少，但係我做到十首歌都係自己作曲、填詞，同埋全部都有派台，係一個小創舉。（想喺樂壇頒獎禮攞獎？）我未看透頒獎禮，我想攞獎，想得到認同，但心態要健康，人哋得獎，我都會戥人開心！」