車車睇NBA一哥大戰　愛隊贏波勁開心

藝人車車（張紫櫻）早前放低賽馬節目主持工作，到美國欣賞NBA矚目賽事勇士對騎士，車車說：「雖然馬季未抖暑，但係我都暫時放低工作，因為呢場NBA大戰不容錯過！聯盟『一哥』勇士主場對東岸『一哥』騎士，呢個戲碼係上年決賽翻版，所以我帶團過去睇波。我以前都帶過團睇英超，但轉睇籃球係第一次，雖然我都有喺電視睇過NBA，但現場感受好唔同，籃球可以話冇悶場，有靚女啦啦隊跳舞助興，又有紀念品派，我仲攞到件聖誕版特別Tee添，雖然係One size，我着完個Look好hip hop，但都OK，英超就冇紀念品送喇！唔怪得NBA球迷睇得咁開心。」

車車又指對一位球員一見鍾情，她說：「我慶幸最後勇士贏到波，證明我冇剋死佢哋！我鍾意勇士嘅史堤芬居里（Stephen Curry）比賽，佢簡直神乎其技，動作好敏捷，佢令我對籃球更有興趣，我會因為佢睇更多嘅勇士賽事。其實呢段時間本來係當地嘅雨季，但嚟到大部分時間都係天晴，所以我就去咗跑步，留低啲『腳印』先，不過三藩市啲路幾斜，喺上面跑感覺好似玩緊Crazy Taxi個Game咁，係個難忘經驗！」