宣萱爆陶大宇同吳啟華反面缺席新劇宣傳

藝人吳啟華、宣萱（Jessica）、呂晶晶及趙碩之等，於澳門出席劇集《隱世者們》記者會。當中舊拍檔啟華及Jessica於台上送笑彈兼聚舊，啟華率先自認「老演骨」，而Jessica就戲稱拍檔陶大宇因與啟華「反面」故缺席：「佢好想嚟，但佢怕咗你！」此話一出令啟華急急否認：「大家合作好開心，我絕對冇介意戲份多少！」其後記者會中就播出因事未能現身的陶大宇拍片支持片段，大宇更在片中透露即將在劇中與宣萱有床戲，笑言會全力以赴、發揮得淋漓盡致，又叫宣萱要準備好。

重申無不和

其後啟華受訪時重申與陶大宇並無不和：「不嬲好朋友，係訓練班舊同學，識到依家先有機會合作。」問到拍攝進度？他說：「問監製，未見過劇本，但大家溝通好足。（飛紙仔拍劇？）咁多年已經好習慣，有劇本反而唔慣，背太熟唔係好事。」

同趙碩之純愛關係

談及啟華於戲中與趙碩之談情，他笑稱是段純愛關係：「佢係單純嘅複製人，我哋係puppy love，冇身體接觸。（同劇陶大宇同宣萱有床戲，你冇咪好蝕底？）拍戲啫！」

同大宇做床戲駕輕就熟

而宣萱被問到目前的拍攝進度，她表示處於「飛紙仔」狀態，直言有壓力，因記對白的能力不及20年前，至於與陶大宇的床戲，她說：「未拍，唔知有幾長，不過對手係大宇就OK，都駕輕就熟。（尺度比電視大？）係啦，要減吓肥，唔使飛紙仔啦，床戲都冇對白。」又謂與大宇拍劇不擔心對方會博慒。