王灝兒同新公司一拍即合　大讚勁有火

歌手JW（王灝兒）去年約滿黎明旗下的A Music轉簽新公司，推出新歌《矛盾一生》唱到街知巷聞，她分享歌曲意思：「首歌係收集咗好多朋友嘅故事、自己某啲經歷之後得出嘅idea，想講啲情侶一齊咗好耐，男方唔識發奮努力，女方會好矛盾，應該等定抑或離開呢個人？如果搵另一半真係要搵個好愛自己嘅，當個男人好愛你嘅時候，佢會計劃埋你哋嘅將來，唔會想你哋下半生好辛苦咁過，當你搵到個好愛你嘅男人嗰陣唔需要介意同佢一齊捱，因為你哋有好明確嘅目標！兩個人一齊最重要係安全感，當女仔有安全感就唔會咁矛盾，呢首歌就正正係講呢樣嘢，女仔青春好寶貴，佢哋聽完首歌會好有共鳴。」

她又感謝老闆Eugene給予肯定，大讚公司方向與自己夾到絕：「好多謝Eugene，佢好相信我，亦好相信我嘅聲音！呢間公司好有火好有目標，我亦被呢樣嘢感動，成team人一齊畀心機。」她亦未有忘記在A Music得到的一切：「我從來都唔覺浪費咗時間，靜咗嗰幾年都冇放棄過，一路增值自己，學唱歌跳舞又做gym。當然曾經有問過自己，有諗過呢行仲值唔值得我留喺度，但屋企人同好朋友都支持我、撐住我！」

JW坦言夢想開個唱，但深明不能心急：「我好proud of自己喺A Music嗰段時間，經歷咗好多嘢，同Leon同台真係我榮幸，又同Janice（衛蘭）合唱，仲有雷頌德畀好多機會我！最難忘係上紅館唱歌同埋《男人信什麼》拎到金曲金獎，但嗰陣第一年入行，未識真正咁珍惜上台攞獎個感覺，對我嚟講係好唔真實嘅事。自己都有目標，做歌手一定想開騷、開巡唱，但係要儲多啲好歌之餘，亦要配合天時地利人和，所以依家都係focus喺音樂上逐步逐步行！」