李克勤擊敗強敵李玟　《歌手4》登榜首

出戰內地節目《我是歌手4》嘅歌手李克勤一直堅持唱廣東歌，頭兩集成績就真係唔太好，第一集李克勤唱譚詠麟嘅《霧之戀》得第三，第二集唱郭富城嘅《當我們知道你們相愛》得第五，排名愈跌愈低，面對被OUT嘅危機，情況令人擔憂，好彩喺最新一集李克勤嚟個大逆襲，憑張學友嘅《遙遠的她》擊敗強敵李玟及韓國歌手黃致列，成功榮登本周榜首。

《遙遠的她》呢首經典歌咁多年嚟有唔少人翻唱過，今次李克勤就用類似a cappella嘅模式去演繹，唱出全新嘅感覺，就連30年前同張學友監製呢首歌嘅區丁玉都大讚李克勤夠創新，仲帶畀觀眾有黑人喺教堂唱福音音樂嘅感覺，有網民仲激讚李克勤唱出嘅感覺好過原唱夠晒入心入肺。而李克勤成功奪冠亦喺微博分享喜悅寫上：「第一次拿到《我是歌手4》的周冠軍，開心+開心+開心！家人和兒子更開心，謝謝編曲嚴勵行、JohnnyYim、梁老師和和音團Metro、李維嘉和《我歌》所有工作人員，我會繼續努力的！」

同李克勤極之老友嘅校長譚詠麟知道消息之後，亦都即時喺微博分享同埋送上祝賀：「恭喜！有付出心思當然會有回報的！」