許廷鏗認貪心恨牙醫歌手雙線並存

許廷鏗在電台訪問中談到當年參加巨聲幫歌唱比賽，被封為「將軍澳吳尊」成人氣風頭躉，如今回想起來，他形容是人生前所未有的挑戰，他說：「我仲記得比賽完冇幾耐同林峯、及一眾巨聲幫喺紅館開演唱會，但表演第二日就要考大學四年級升五年級嘅中期試，當時喺紅館後台，我真係唔知應該攞起考試筆定係歌詞先好，取捨唔到，我都唔知當時自己點發揮咁大嘅潛能。」

取捨遲早要面對

如今，許廷鏗依然堅持邊行醫邊唱歌，他坦言有時身心透支分身不下，但仍未想放棄牙醫的工作，他說：「坦白講，娛樂圈賺錢係會比做牙醫所賺嘅快，但感覺唔係咁實在。因為觀眾緣同認受性唔可以強求，歌迷要來要走，都唔可以控制，唯有自己做到最好。但有時真係好攰，取捨選擇係遲早一日都要面對嘅問題，好多牙醫前輩都叫我專心去闖娛樂圈，但依家就當我貪心好了，我想牙醫同歌手雙線並存，牙醫嘅工作係可以令心態上取得一個平衡。」