太陽報C1：張家瑩百萬開餐廳賺錢唔夠「猴」

前亞姐冠軍張家瑩早前約滿亞視，並於日前向一班舊同事派散水餅。在亞視打滾近八年的她試過人工僅有萬多元，又經歷過冇糧出，但種種挫折沒有把她擊倒，反而讓她在危機中成長。Grace前年8月與朋友合夥開食肆，升呢做老闆娘。今日年廿八，她到自家餐廳大掃除，寓意洗走衰氣，有個新開始！

為餐廳投資7位數的Grace一直心急回本，她說：「老實講剛開張嗰時生意幾差，尤其頭兩個月，我哋都捱得辛苦，最後比預期遲咗大半年先回到本，上年中秋我哋先第一次分錢，分到大概6位數，嗰刻我感動到喊咗出嚟！」她自認是「先死而後生」，至今餐廳終於上軌道，她更銳意再下一城，預計投資百萬在金鐘開分店，然後再進軍內地，計劃在成都及杭州開分店，她說：「當地有投資者朋友同我傾過，成都同杭州都有商場畀到我開舖！我都未知開幾多間，如果太多間嘅話，可能要分特許經營權畀人。」

Milkis招財入屋

而銳意在新一年發威的還有蕊蕊與師妹Milkis，二人齊齊為身體「洗邋遢」，做通淋巴美容，將不順意的事情「通」走！蕊蕊更露「事業線」及長腿吸睛，又指會買新內衣催運：「買啲紅色同粉紅色，寓意希望由頭旺落尾，旺足成年！」提到不順意的事情，應是被屢傳與金剛情變，但蕊蕊笑言「金剛」不怕洪爐火：「我哋真金不怕洪爐火，唔使做太多表面嘢，大家心裏有數，我哋知就OK啦！」而Milkis希望招財入屋：「屋企會開晒啲門同窗，等啲財入嚟！」

FFx洗走「負評」

至於因歌曲《Sugar Baby》而被網民惡搞的組合FFx，則炮製腐竹白果糖水迎春接福，四人洗腐皮，寓意洗走「負評」。談到去年的負評，Shirley說：「起初都會唔開心，但睇得多覺得係一種鼓勵，希望新一年有好評！」談到新年大計，FFx表示會推出新歌《MK Pop》，問到可會介意被網民取笑MK時，四人都為MK Pop感自豪，Ceci說：「無論MK Pop或K-Pop都好，總之Pop得起就係好。」

化妝：Kitty＠嫁妝Ms.Workshop

髮型：Ian＠hair trinity

更多新聞請瀏覽太陽報網頁：

http://the-sun.on.cc/