莊思敏三姊妹Sweet爆整湯丸

來自馬來西亞的藝人莊思敏、莊思華和莊思明三姊妹，回想童時在家鄉過節的快樂回憶。莊思敏表示通常會一家人聚首一堂團年、開年，會跟足傳統食一些賀年應節食品，她說：「其實馬來西亞同香港過年差不多，傳統上會有吃『撈起』呢樣食品。食品有一啲簡單食材，好似係一啲紅蘿蔔絲、白蘿蔔絲、青瓜絲、花生、三文魚，亦會有人會落鮑片。」她表示最重要是令食品顏色鮮艷、材料多，喻意「全年豐足」。莊思華表示最重要是「撈起」這個動作，喻意是「愈撈愈掂，愈撈愈高」。

整湯丸孝敬父母

為了孝敬父母，三姊妹今年齊齊入廚學整湯丸，喻意「一家人團圓」，誓要在農曆年間一顯身手。三人手搓糯米粉表現有板有眼，然後慢慢將紅豆慢慢放進在內再搓圓。期間三姊妹又拿着湯丸整蠱造怪，結果三人在一片喧嘩聲中造出了「莊氏湯丸」。

踢爆兩妹喜歡「爭」

問到三姊妹平時是否都是在喧嘩聲中過日子？莊思敏則踢爆兩妹由細到大喜歡「爭」，她說：「明明兩樣嘢係一模一樣，佢哋都要爭到不罷休，我都唔知佢哋爭啲乜，動機可能真係為爭而爭，可能佢哋眼中同一樣嘅嘢亦有唔同，但明明真係一模一樣㗎。」莊思華和莊思明則表示家姐與別不同，會經常帶她們出街玩，不會經常困她們在家與世隔絶，莊思敏說：「其實依家佢哋兩個都咁大個女，冇咩好擔心。有咗工作經驗，見得人多咗會有自己睇法，若果遇到人和事有危險，我先至會出聲提點，佢哋都咁大個人識保護自己。」

鬧交歸咎於硬頸固執

三姊妹又承認以往不時鬧交，莊思敏歸咎於全家人性格都是硬頸和固執所致，她說：「全家人性格都固執，所以成日為咗好少事就會鬧交，但好在拗完交就好快冇事。我哋個個都性子急嘅人，有時處理家中事處理唔好，有時叫佢哋出門口，十五分鐘都未行得，我就會着火。」

三姊妹新年願望

踏入新一年，三姊妹表示新年願望是開心心，身體健康，莊思華說：「2015年身體比較差，曾經感染豬流感，結果被隔籬咗十幾日，我連手足口病都中過，所以真係明白健康好重要，冇健康乜都做唔到。」莊思明則表示希望可以新一年換新車代步，她說：「我架細車用咗好耐，想要架大車。」莊思敏則表示2016年作多一點不同的嘗試，希望新一年在工作上有更大挑戰，好似演出上有不同角色和層次的演出。」她表示最希望點心食肆的生意可以上軌道，點心店帶到內地和其它東南亞區地方，笑言「想被點心養起我。」