祥仔狂抽大帽山野蠻女　網民激讚夠乾身

藝人阮兆祥（祥仔）一向都係搞笑同抽水高手，日前祥仔就趁農曆新年，拍咗條「條命係阮兆祥自己」拜年篇，等大家笑住迎新年！

爆金句

短片以早前被阻上山嘅「大帽山野蠻港女」狂鬧阿Sir一幕做藍本，改編成上山拜年逗利是篇。負責扮演野蠻港女嘅祥仔，大爆港女經典金句，包括：「點解要限制人嘅自由喎？」、「你識唔識法律架？」、「你唔好Nonsense」啦等等，入型入格，十分爆笑！

造型如倒模

而成件事除咗對白，造型同其他角色一樣跟足原著。首先，不得不提祥仔套衫，佢同港女嘅造型好似倒模咁，最抵死係佢嗰條牛仔短褲同黑絲，真係齋睇個造型都笑出嚟。而另外兩位扮演「警員」嘅臨時演員都好戲，佢哋同祥仔鬥歇斯底里，其中一個仲好應節咁爆咗句：「你再唔落去我幫你開年！」

臨尾穿崩

不過話晒係拜年篇，點都會和氣收場嘅。祥仔去到尾段，就問冇份出鏡、但聲演記者嘅工作人員有冇記者證，該位演員表示有「利是派」，此時祥仔再施展變臉特技，一秒現歡顏，而成班演員隨即拉晒炮仗、笑晒口咁同大家拜年，實在搞嘢。其實，喺條片嘅中尾段，啲炮仗已經穿晒崩，但喺呢個年初一氣氛咁沉重嘅猴年，大家都係志在睇吓開心嘢得啖笑，所以都唔會怪祥仔嘅。

而條片嘅反應，亦相當之好，唔夠三日，已經超過13萬點擊，證明大家都好buy祥仔嘅抽水。有唔少網民仲激讚祥仔抽乾晒啲水：「哈哈！好好笑，抽到好乾身！」