張美妮張嘉兒望一齊拍劇鞏固姊妹情

新春佳節，情同姊妹的張美妮和張嘉兒向大家拜年，祝生生猛猛，行運一條龍！

問猴年有何大計，美妮說會和嘉兒拜年，人妻美妮說：「行花市就講過好多次都約唔到，拜年就一定會！我記得一結完婚嗰年嘉兒第一時間打畀我，問我幾時見面，話要?我封利是，因為我哋好Close，我派利是畀佢自己都好開心！」

派利是秘訣預多啲冇尷尬

而「新手」人妻的嘉兒就表示要向美妮多多請教：「頭先我哋兩個先傾緊派利是嘅嘢，因為我今年第一年派，好多問題問佢，例如要封幾多錢、有咩習俗……」美妮即場傳授心得指：「我同佢講一定要預多好過少，換錢又要預早準備，公司又多人一唔夠派就好尷尬！」

嘉兒坦言每個農曆新年的願望都差不多：「都係最想身體健康，屋企人快快樂樂！」美妮則謂：「工作就想做多啲新角色，同埋希望我哋兩個可以一齊拍劇！」提到去年的事，嘉兒直言過得十分充實：「上年發生好多事，自己結咗婚、又畢業、又拍劇，好開心、好豐富，我好感恩！」

嘉兒愛遊埠美妮鍾情廚藝

兩位人妻在家庭方面同樣有新目標，嘉兒指：「想同老公去多啲旅行，去多啲唔同嘅地方，自己鍾意去日本，亦想返溫哥華探屋企人，Shopping、滑雪、睇風景、食嘢，乜都鍾意，好貪心！但最想可以同美妮兩Pair人一齊去旅行！」美妮則說：「我就想更加努力做個好老婆，學煮多啲嘢食！依家學緊整西餐，遲啲再學埋中式，希望下年新年可以一家人上嚟我屋企，我煮餐九大簋畀佢哋食！」