情人節做咩好？梗係聽慘情歌啦！

適逢2月14情人節，光棍唔想喺街見到一對對情侶就唯有留喺屋企，之但係夜闌人靜難免勾起情傷，有網民就大數「應節」慘情歌，當中梗係唔少得「兵歌之王」周柏豪一系列嘅《六天》、《我不要被你記住》、《夠鐘》、《傻小子》，入面啲歌詞「從來沒我份，犧牲當做例行，我慣了傷心」、「夠鐘死心了，當你沈默得高調」......真係睇到歌詞已經Sad到入心入肺！仲有「兵歌之后」衛蘭嘅《一場誤會》、《大哥》、《殘酷遊戲》等等，齋聽歌名已經想喊喇！而新啲嘅兵仔歌仲有《念念不忘》同埋《原來她不夠愛我》！

推JW做慘情歌后

不過有大批網民就熱推之前憑《矛盾一生》唱到街知巷聞嘅JW為新一代慘情歌后，佢首新歌《多少年》講到分手唔可以一下子放低多年感情，唱中晒一班光棍、失戀男女嘅心聲，有網民留言話：「今日我選擇同你分開，是不想大家再辛苦下去。我的答案早就在心裡（裏），但是我聽過很多朋友的議建，只不過係安慰緊自己，不捨得是一定有，但是分開之後是不是，會好過一點呢？現在我知道會好辛苦，但是過多少年，可能會放下呢！」

Dear Jane慘情歌製造廠

亦有人推樂隊Dear Jane為慘情歌製造廠，多首歌包括《最後一次》、《一去不返》等都唱出放唔低情傷嘅悲哀。仲有網民留言回帶已消逝嘅戀情：「容許我喺呢度最後一次想你，然後放低，然後偷偷咁繼續愛你，默默祝福你！」嘩！喺呢個節日，自己一個喺屋企，再聽埋啲咁慘情歌、兵歌、失戀歌，嗯......小編都唔忍心再講落去喇。

網民有話兒

Ng Kaxxxx：側田首《好人》又何嘗唔應節？「平凡像我路過，十個似我，情敵實在太多～～～」

CN XXX：JW加油！又係一首好有共鳴嘅歌！聽多幾次發現仲正過《矛盾一生》，已中毒！

Kin Wxx：今次呢首比《矛盾一生》更有深度，歌詞都更成熟，JW唱法亦唔同咗，好有靈魂同感情！

Yuli LXX：何以，我變了你的16號愛人！！！！！！

MoominXXX：我電話個list簡直有晒「自虐」情歌top 50！《垃圾》、《寵物》、《愛與誠》、《獻世》......數都數唔晒，但情人節要單身咁過，我會聽k-pop，唔會畀自己亂諗嘢囉。