網民熱話：「最強武器」對抗周子瑜

香港女子組合As One嘅中韓混血成員Shin（吳思佳），早前亮相韓國女團選秀節目《Produce 101》，睇得又唱得嘅佢不單獲主持人賞識，更被韓國網友力捧，認真為港爭光！其實，呢個節目只係播出咗短短四集，不過係由唔同娛樂公司派出總共101位練習生，力爭成為11人女子組合，換言之要淘汰90人先可以出道，咁殘酷又具話題性，難怪迅速成為城中熱話！而節目中同樣表現出色嘅混血靚女Somi、被封為「周子瑜第二」嘅周潔瓊以及貌似韓國女團f(x)成員Krystal嘅Danielle都備受關注，網友更認為佢哋有望成為對抗人氣爆燈嘅周子瑜，成為「最強武器」！

14歲Somi早有粉絲關注

首先係擁有韓國女團Wonder Girls及miss A等嘅JYP事務所嘅練習生Somi，現年只係14歲，但憑住一副混血靚樣，以及開朗活潑嘅性格，唱歌同跳舞又瓣瓣掂，梗係成功上位啦！加上Somi曾參與另一選秀節目《Sixteen》，當時已經引起關注兼儲落一大班粉絲，而每集節目都會有人氣排名，身為人氣王嘅佢一直排頭幾位，難怪被網友指佢今次出道有望啦！

18歲周潔瓊夠Girlfriendable

因與韓國女團TWICE成員周子瑜撞樣，被封為「周子瑜第二」嘅周潔瓊，現年18歲嘅佢來自上海，擁有清純外表，加上識彈琵琶，又pure又有才華加晒分啦！唔少網友都話被佢一雙水汪汪大眼電暈，對佢喺節目中不時撒嬌嘅表現非常受落，樣同性格成個人都好girlfriendable！所以網友都覺得周潔瓊他日出道後嘅人氣應該同周子瑜有得揮！

16歲Danielle有黃金比例

另一人氣王Danielle，為韓國女團T-ara小分隊成員之一而廣為人知，有168cm嘅佢身材高挑，網友都讚佢手長腳長，跳舞時特別悅目同吸睛！佢仲同韓國女團f(x)成員Krystal有幾分相似，外表睇落有啲高傲，只有16歲嘅佢rap實力不俗，難怪殺出條血路，吸納一班女粉絲，同男女通殺嘅周子瑜不相伯仲呀！

網民有話兒：

軟糖XX：呢個節目好睇在成百個女仔爭出道，夠殘酷！

RabiXXXChan：Somi之前係（喺）《Sixteen》被淘汰，搞到我傷心勁耐，好彩依家佢出現返（番）。

JonXXXX：周潔瓊又pure又true，又識彈琵琶，正！絕對同周子瑜有得揮！

XX米恩：其實Danielle都唔錯，手長腳長跳舞好睇，rap同唱歌又唔差。