歌手黎曉陽到電台宣傳自己作曲的新歌《永遠很近》，表示新歌講大家會擔心將來的事，亦會後悔過去的事，往往都會忽略現時的事，故新歌就是提醒大家要活在當下。

呻出碟艱難

黎曉陽亦表示新歌找得網絡紅人杜小喬做女主角，自己飾演男主角，問到可有親熱戲份？他笑言沒有，只是行行企企。他亦透露之前成功集資廿萬出碟，而4月8日會跟同樣成功集資出碟的林一峰、林二汶等人開音樂會：「依家出碟好難，但難得我哋肯試，試完又成功，所以就當係慶祝。」

黎曉陽亦透露之前跟張學友和林嘉欣拍《暗色天堂》：「我第一次拍戲，裏面我做宅男，其實收到電話叫我去拍嗰陣仲以為係整蠱電話，所以好開心可以參與。（同佢哋有對手戲？）係。（有冇同學友交流音樂？）有呀，我哋都係十八區歌唱比賽出身，我唔記得我係第幾屆，佢係第二屆，所以有同佢傾音樂，難得見到歌神。（學友叫你作歌畀佢？）佢有叫我畀我啲歌佢聽，我畀咗首《香港傑出廢青》佢聽，佢聽完話點解啲聲咁奇怪，我就同佢講因為我用啲垃圾做樂器，佢就話幾有趣。」他亦表示之前為電影《陪安東尼度過漫長歲月》寫主題曲，而該曲則由陳奕迅唱。