71歲盧大偉傳病危　太太：請別詛咒佢

無論你幾多歲，都一定識得盧大偉呢位前輩，只要你睇過或者聽過《歡樂今宵》呢個經典綜藝節目。

盧大偉可以話係電視圈搞笑始祖，上年佢原本應承出席《歡樂今宵》嘅聯歡晚會，但最後都唔見人影。而今日突然傳出佢病危嘅消息，仲話佢係患上腸癌，仲話佢瘦咗唔少。

而睇番盧大偉出席活動嘅相，最近一次係舊年六月份嘅李龍基活動，當時嘅佢望落已經消瘦唔少；而《東網》亦都摷過佢嘅臉書，發現盧大偉真係近幾個月一直係咁瘦落去，而去到12月，更加係瘦到我見猶憐。

「咩病唔想講」

對於盧大偉被指患癌病危，其太太接受《東網》訪問時否認患腸癌，並謂：「梗係唔係（腸癌）啦！啲人語無倫次，佢只係年紀大，健康有啲麻煩，年紀大機械壞，梗係要唧下油啦！絕對唔係腸癌。（佢咩病？）咩病就唔想講，我唔係醫生，我仲消化緊（件事），都多謝大家關心，David陪住大家成長，希望大家唔好詛咒佢，應該用祝福字眼。」問到兩夫婦的口才教室生意，盧太表示近日主力由自己打理，David則多作休息。