黎明唔自覺係金句王：我只係講事實

天王黎明（Leon）接受電台主持人鄭裕玲（DoDo）、少爺占及王貽興錄音訪問，問到黎明是否好耐冇到電台訪問，黎明坦言都算幾耐，都是緣份來。而黎明稱與DoDo很多年前已認識，當時在電視台工作，見到面都要匆匆忙忙打招呼。

因黎明既是藝人又是老闆，DoDo提到外傳公司大小事都要問准黎明？黎明則言：「有啲人根本唔知尺寸點拿捏，最好用我嚟做擋箭牌啦，我又唔會知，話Leon唔畀就最簡單。」點先要理？黎明謂：「合理就理，講得出做唔到嘅嘢，就唔好做，搏命做，以為人哋會睇到，其實睇唔到，亦唔好做。」

拍戲最緊要唔蝕錢

問到平時黎明如何分配時間？黎明竟長嘆一聲，似24小時不夠用：「唉...之前拍咗部戲，有份做導演，依家搞緊剪接，下星期我又要去做嘢嘞，講咗啲Angle交畀人去剪，拍電影失敗預七成，平倉20％，咪令拍檔蝕錢就得。」

唱K練歌藝

再講到四月底4D演唱會，黎明稱由雷頌德、伍樂城、C.Y.Kong做音樂。說到會否錄新歌？黎明搞笑說：「有好聽嘅歌，我根本唔使三個鐘錄晒，以我今日嘅造詣，我冇退步，我有進步㗎，我有唱K。」

有指若黎明要歌詞大把人給他，黎明即踢爆說：「林夕搵起上嚟係消失㗎！而雷頌德嗰啲打麻雀就覆，我嗰啲唔覆㗎。」黎明更以夫妻交流來比喻炮製新歌：「有新歌一早畀咗你，唔會等你叫先畀，好多時等你叫先畀，老夫老妻都要離婚啦，要自動自覺嘛，不停叫你好斟碗湯畀我，講得多都口乾啦，但如果突然有人斟碗湯畀你，咪就搞掂囉。」黎明說畢後，即獲DoDo讚賞，說喜歡和Leon傾偈，有嗰句講嗰句。

最後DoDo問黎明對「講金句」點睇？黎明則言：「完全冇感覺，金句、銀句、銅句都冇所謂，開心咪得，我又唔覺得係金句，係講事實，事實先可以講落去。」