亞姐多靚女　利智葉玉卿成經典

亞視於1985年開始舉辦亞洲小姐競選，多年來辦得有聲有色，當中大部分當選佳麗（不過都係以舊嗰班為主），更在娛樂圈薄有名氣，有啲更加喺內地同無綫打出一片天，包括黎燕珊、葉玉卿、利智、萬綺雯、翁虹、伍詠薇、楊恭如、陳煒、吳綺莉、朱慧珊及羅霖等。講到亞姐經典，唔可以唔提當年47歲參選亞姐嘅宮雪花，佢嘅出位行徑同埋自信，至今成為佳話，嚴格嚟講，可以話只要有宮雪花嘅地方，就有笑料。

戴莎莎成選美奇葩

而另一位亞姐嘅經典，絕對係07年參賽嘅戴莎莎，佢雖然決賽不入，但佢冇剃腳毛都夠膽選美就成為咗一時佳話，之後佢驗處女膜嘅行為，仲令佢成為選美界嘅奇葩，雖然佢唔夠宮雪花持久，但爆笑度絕對稱冠。

而喺邱德根年代，亞視連續5年獲得亞太小姐舉辦權，當時由亞姐冠軍代表參賽，其他參賽者來自亞洲及太平洋等地，黎燕珊同利智均是亞姐代表中取得最好成績嘅佳麗，同樣獲得第四名。

亞生開創男士選美先河

除了透過選美揀靚女新力軍外，亞視於2005年、2011年至2014年也有舉辦亞洲先生競選，打開本地男士選美先河，當中不少為人認識嘅男明星，好似邱士峻、林睿、黃集鋒、鍾昊同埋已經過檔無綫嘅翟威廉咁，都係亞生出身。亞視喺1986年亦有舉辦電視先生選舉，仲成功捧紅過孫興同姜皓文等男星。