除咗劇集，亞視嘅綜藝節目都有爭氣嘅時候（雖然可能五隻手指數得晒），而且仲曾經創下唔少本地電視界先河。1979年，麗的開闢深夜節目時段，炮製《貓頭鷹時間》介紹聲色犬馬資訊，令觀眾耳目一新。

《不設防》：食煙飲酒講粗口惹熱議

去到1988年，亦即係變咗亞視嘅年代，佢哋就再次推出《活色生香》，當時個節目係由李道洪、周美鳳同洪羅拔主持。由於個節目有gimmick，翌年亞視再將深夜節目時段發揚光大，邀請三位才子蔡瀾、黃霑同倪匡主持清談式節目《今夜不設防》，訪問過唔少當紅影星好似林青霞、鍾楚紅等，就連日本經典女歌手小泉今日子都上過節目，收視口碑皆佳。

而呢個節目最令人難忘嘅其中一part，除咗三位主持會喺節目度討論性同愛嘅相關話題，佢哋Keep住喺節目度食煙、飲酒、講粗口（簡單嚟講即係教壞細路），都惹起咗唔少議論。（至少，到依家，唔少70後，都仲記得佢哋烏煙瘴氣嘅場面）。而面對主持講粗口，亞視初初都會用「嗶」一聲掩蓋；但由於太多觀眾覺得嗶一聲仲礙耳，最後就任由粗口直碌出街，都真係前無古人㗎。

解剖外星人贏收視輸口碑

之後，亞視1994年黃金時段、逢星期一至五推出時事娛樂節目《今日睇真Ｄ》，由林建明、何守信等主持，仲打破傳統手法，深入追蹤話題性新聞同娛樂新聞，收視節節上升，仲逼到無綫變陣，推出《城市追擊》迎戰。而《今日睇真Ｄ》其中一個經典，當然係解剖羅茲威爾外星人啦，收視一度高升到20點甚至以上。雖然個題材夠晒有gimmick，但事後就有觀眾鬧爆短短幾分鐘嘅「解剖片段」，竟然分幾日重覆播放，呢個都成為咗後世熱話。

《尋找他鄉》收視值爆燈

不過亞視都有完勝嘅綜藝節目，好似1998年、由「戲劇大師」鍾景輝任旁述、遠赴世界各地拍攝嘅海外華人生活紀錄式節目《尋找他鄉的故事》，配以喜多郎嘅樂曲，感動不少觀眾。呢個節目，總共出咗六輯，除咗收視同口碑唔錯，仲咁多輯都成為咗當個年度電視欣賞指數調查嘅「最佳電視節目第一位」，絕對唔失禮。

《百萬高翁》收視王牌

另外一個不提不可嘅綜藝節目，絕對係2001年獲英國獨立電視台（ITV）授權製作嘅《百萬富翁》，由陳啟泰主持，除咗啲問題可以令大家增廣見聞，豐富嘅獎金亦成為超級大賣點，當年收視最高去到39點，撼贏埋香港小姐競選，成為亞視當年嘅收視王牌。